ប្រតិបត្តិការស្វែងរក និងជួយសង្គ្រោះបានបន្ត នៅក្នុងតំបន់អាម៉ាហ្សូនប្រទេសប៉េរូ បន្ទាប់ពីបំណាក់ដីដ៏ខ្លាំងក្លាបានពន្លិចទូកដឹកអ្នកដំណើរពីរគ្រឿងនៅលើទន្លេ Ucayali បណ្តាលឲ្យមនុស្សយ៉ាងហោចណាស់ ១៣នាក់ស្លាប់ និងមនុស្ស២០នាក់ផ្សេងទៀតរងរបួស។

គ្រោះមហន្តរាយនេះ បានកើតឡើងនៅម៉ោងប្រហែល៤:២០ព្រឹកម៉ោងក្នុងស្រុកនៅតំបន់កំពង់ផែ Iparia ស្ថិតនៅចម្ងាយប្រហែល៤១៥គីឡូម៉ែត្រភាគឦសាននៃរដ្ឋធានី Lima របស់ប្រទេសប៉េរូ។ មនុស្សចំនួន ៥៧នាក់នៅតែបាត់ខ្លួននៅឡើយ នេះបើយោងតាមទីភ្នាក់ងារសារព័ត៌មានប៉េរូ Andina។

វីដេអូពីយានដ្រូនបានបង្ហាញពីមន្ត្រីនគរបាលកំពុងរុករកសាកសពនៅក្នុងទឹកទន្លេ ខណៈក្រុមជួយសង្គ្រោះបានរាវរកនៅច្រាំងទន្លេចោតក្នុងកិច្ចខិតខំប្រឹងប្រែងស្វែងរកជនរងគ្រោះ។

បំណាក់ដី បានវាយប្រហារទូកពីរគ្រឿងដោយមួយគ្រឿងបានលិចទាំងស្រុង និងមួយគ្រឿងទៀតខូចខាតធ្ងន់ធ្ងរ។ ទូកឈ្មោះDeo Rigo បានធ្វើដំណើរពីសហគមន៍ជនជាតិដើមភាគតិចដែលនៅក្បែរនោះ ហើយបានឈប់នៅកំពង់ផែ Iparia ដើម្បីឱ្យអ្នកដំណើរចុះពីលើទូក នៅពេលនោះបំណាក់ដីបានកើតឡើង។