ក្រសួងដឹកជញ្ជូនម៉ាឡេស៊ី បាននិយាយនៅថ្ងៃពុធ (៣ ធ្នូ) នេះថា ប្រតិបត្តិការស្វែងរកជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ី ដែលបានបាត់ខ្លួន នឹងបន្តជាថ្មីម្ដងទៀតនៅថ្ងៃទី៣០ ខែធ្នូ ខាងមុខ រយៈពេលជាងមួយទសវត្សរ៍បន្ទាប់ពីជើងហោះហើរដែលតម្រង់ទៅទីក្រុងប៉េកាំងមួយនេះ បានបាត់ស្រមោល នៅក្នុងអាថ៌កំបាំងអាកាសចរណ៍ដ៏ធំបំផុតមួយរបស់ពិភពលោក។

គួរម្លឹកថា យន្តហោះប៊ូអ៊ីង 777 ជើងហោះហើរ MH370 ដែលដឹកអ្នកដំណើរ ២២៧នាក់ និងបុគ្គលិក ១២នាក់ បានបាត់ ក្នុងអំឡុងពេលធ្វើដំណើរពីទីក្រុងគូឡាឡាំពួ ទៅកាន់ទីក្រុងប៉េកាំង ក្នុងខែមីនា ឆ្នាំ២០១៤។ ប្រតិបត្តិការស្វែងរកយន្តហោះជាច្រើនលើក ត្រូវបានធ្វើឡើងចាប់តាំងពីពេលនោះមក ប៉ុន្តែពុំទទួលបានផ្លែផ្កាអ្វីឡើយ។

ការស្វែងរកថ្មីៗបំផុតនៅមហាសមុទ្រឥណ្ឌាភាគខាងត្បូង ត្រូវបានផ្អាកក្នុងខែមេសា កន្លងទៅ បន្ទាប់ពីធ្វើឡើងអស់ប៉ុន្មានសប្តាហ៍ ដោយសាតែលក្ខខណ្ឌអាកាសធាតុមិនល្អ។ ក្រសួងដឹកជញ្ជូនម៉ាឡេស៊ី និយាយថា ក្រុមហ៊ុនរុករកផ្លូវសមុទ្រ Ocean Infinity បញ្ជាក់ថា ខ្លួននឹងចាប់ផ្តើមប្រតិបត្តិការតាមរកនៅបាតសមុទ្រឡើងវិញ ក្នុងរយៈពេល ៥៥ថ្ងៃ ដែលធ្វើឡើងជាបន្តបន្ទាប់ ចាប់ពីថ្ងៃទី៣០ ខែធ្នូ ខាងមុខ។

អាជ្ញាធរមិនបានផ្ដល់ទីតាំងច្បាស់លាស់នៃតំបន់ស្វែងរកទេ។ ម៉ាឡេស៊ី នឹងបង់ប្រាក់ឱ្យក្រុមហ៊ុននេះចំនួន ៧០លានដុល្លារ ប្រសិនបើបំណែកសំខាន់ៗត្រូវបានរកឃើញក្នុងអំឡុងពេលរុករកបាតសមុទ្រនៃតំបន់មួយនៅភាគខាងត្បូងមហាសមុទ្រឥណ្ឌា ដែលគ្របដណ្តប់លើផ្ទៃដី ១៥.០០០គីឡូម៉ែត្រក្រឡា៕