ការិយាល័យនាយករដ្ឋមន្ត្រីអ៊ីស្រាអែល បាននិយាយនៅថ្ងៃពុធ (៣ ធ្នូ) នេះថា ការធ្វើកោសល្យវិច្ច័យរបស់អ៊ីស្រាអែល បានសន្និដ្ឋានថា សាកសពដែលក្រុមហាម៉ាស បានប្រគល់កាលពីថ្ងៃអង្គារ មិនមែនជាចំណាប់ថ្នូរ ២នាក់ចុងក្រោយ នៅក្នុងតំបន់ហ្កាហ្សា នោះទេ។

ទូរទស្សន៍រដ្ឋ KAN របស់អ៊ីស្រាអែល ក៏បានរាយការណ៍ថា វិទ្យាស្ថានវេជ្ជសាស្ត្រកោសល្យវិច្ច័យនៅទីក្រុង Tel Aviv និយាយថា សាកសពនោះមិនមែនជាចំណាប់ថ្នូរ ២នាក់ ដែលនៅមិនទាន់រកឃើញ ក្នុងដែនដីហ្កាហ្សាឡើយ។

ក្រុមសកម្មប្រយុទ្ធហាម៉ាស មិនទាន់ចេញសេចក្តីថ្លែងការណ៍ណាមួយពីរឿងនេះទេ។ កាលពីថ្ងៃអាទិត្យចុងសប្ដាហ៍មុន លោក Husam Badran សមាជិកនៃការិយាល័យនយោបាយរបស់ក្រុមនេះ បានប្រាប់បណ្តាញទូរទស្សន៍ Al Jazeera របស់កាតាថា បញ្ហាសាកសពគឺជា "លេសដែលប្រើដោយអ៊ីស្រាអែល ដើម្បីជៀសវាងការបំពេញកាតព្វកិច្ចរបស់ខ្លួនប៉ុណ្ណោះ"។

អ៊ីស្រាអែល បានចងភ្ជាប់ការចាប់ផ្តើមនៃកិច្ចចរចាសម្រាប់ដំណាក់កាលទីពីរនៃកិច្ចព្រមព្រៀងបទឈប់បាញ់ ដែលបានចូលជាធរមាននៅថ្ងៃទី១០ ខែតុលា ទៅនឹងការទទួលបានសាកសពនៃចំណាប់ថ្នូរទាំងអស់របស់ខ្លួន។ អ៊ីស្រាអែលអះអាងថា សពចំណាប់ថ្នូរជនជាតិអ៊ីស្រាអែល ២នាក់ នៅតែស្ថិតក្នុងតំបន់ហ្កាហ្សា ខណៈក្រុមហាម៉ាស និយាយថា ខ្លួនបានប្រគល់ចំណាប់ថ្នូរអ៊ីស្រាអែលទាំង ២០នាក់ដែលនៅរស់ និងចំនួនសេសសល់នៃអ្នកស្លាប់ទាំង ២៨នាក់ អស់ហើយ៕