រដ្ឋាភិបាលរបស់ទីក្រុងហុងកុង នឹងបន្តទៅមុខលើការបោះឆ្នោតនីតិបញ្ញត្តិ "សម្រាប់អ្នកស្នេហាជាតិ" ដែលគ្រោងធ្វើនៅថ្ងៃអាទិត្យ ទី៧ ខែធ្នូ ចុងសប្ដាហ៍នេះ បន្ទាប់ពីគ្រោះអគ្គិភ័យដ៏កំណាចបំផុតនៃទីក្រុងរបស់ប្រទេសចិនមួយនេះ ក្នុងពេលជាច្រើនទសវត្សរ៍ ដែលបានសម្លាប់មនុស្សជិត ១៦០នាក់។

ការបោះឆ្នោតនីតិបញ្ញត្តិនេះត្រូវបានអ្នកវិភាគ និងអ្នកស្រុកមួយចំនួនមើលឃើញថា ជាការសាកល្បងមួយសម្រាប់រដ្ឋាភិបាលក្រុងហុងកុង ខណៈខ្លួនព្យាយាមបន្ធូរបន្ថយកំហឹងសាធារណជនចំពោះសោកនាដកម្មអគ្គិភ័យ។

មេដឹកនាំក្រុងហុងកុង លោក John Lee បាននិយាយកាលពីថ្ងៃអង្គារថា ហុងកុងត្រូវតែមានទស្សនៈវែងឆ្ងាយ ឆ្ពោះទៅមុខយ៉ាងរឹងមាំ និងជំរុញដំណើរការធម្មតារបស់សង្គមជាលំដាប់ ហើយត្រូវតែបន្តទៅមុខ ដោយប្រែទុក្ខសោកឱ្យក្លាយទៅជាកម្លាំង។

លោកបាននិយាយទៀតថា ការបន្តការបោះឆ្នោតនេះនឹងអនុញ្ញាតឱ្យអ្នកតំណាងរាស្រ្តដែលទើបជាប់ឆ្នោតថ្មី ធ្វើសកម្មភាពយ៉ាងឆាប់រហ័សដើម្បីគាំទ្រដល់ការកសាងឡើងវិញក្រោយគ្រោះមហន្តរាយ និងកំណែទម្រង់បន្ទាប់ពីអគ្គិភ័យ។ វេទិកាបោះឆ្នោតដែលរៀបចំដោយរដ្ឋាភិបាល បានបន្តឡើងវិញចាប់ពីថ្ងៃពុធនេះតទៅ បន្ទាប់ពីត្រូវផ្អាកដោយសារអគ្គិភ័យ កាលពីសប្តាហ៍មុន៕