កិច្ចពិភាក្សាដែលមានហានិភ័យខ្ពស់ រវាងសហរដ្ឋអាមេរិក និងរុស្ស៊ី ពាក់ព័ន្ធនឹងការបញ្ចប់សង្រ្គាម នៅប្រទេសអ៊ុយក្រែន មិនបានរកឃើញផ្លូវទម្លាយភាពទាល់ច្រកនោះឡើយ កាលពីថ្ងៃអង្គារ (ទី២ ខែធ្នូ) ខណៈដែលវិមានក្រឹមឡាំង បានបញ្ជាក់ថា «គ្មានការសម្របសម្រួល» ត្រូវបានរកឃើញនៅឡើយទេ ជុំវិញបញ្ហាដែនដីសំខាន់ៗ។

សូមបញ្ជាក់ថា ប្រធានាធិបតីរុស្ស៊ី លោក Vladimir Putin បានជួបជាមួយកូនប្រសាររបស់ប្រធានាធិបតីអាមេរិក លោក Donald Trump គឺលោក Jared Kushner និងបេសកជនពិសេស លោក Steve Witkoff នៅវិមានក្រឹមឡាំង បន្ទាប់ពីបានផ្តល់សញ្ញានៅមុននេះថា កងកម្លាំងរបស់លោកបានត្រៀមខ្លួនប្រយុទ្ធរួចរាល់ហើយ ដើម្បីសម្រេចបាននូវគោលដៅដំបូងនៃសង្គ្រាមរបស់រុស្ស៊ី។

កិច្ចប្រជុំនេះ គឺជាពេលវេលាដ៏សំខាន់មួយ សម្រាប់អ៊ុយក្រែន ជាអ្វីដែលអាចជាសប្តាហ៍តានតឹង បន្ទាប់ពីមាននូវកិច្ចការការទូតយ៉ាងវក់វីប៉ុន្មានថ្ងៃ។ ការផ្ដោតសំខាន់ គឺផែនការរបស់សហរដ្ឋអាមេរិកដែលនាំឲ្យមានសន្តិភាព ដែលចាប់តាំងពីពេលនោះមកត្រូវបានកែសម្រួលក្រោមសម្ពាធពីទីក្រុងគីវ និងសម្ព័ន្ធមិត្តអឺរ៉ុបរបស់ខ្លួន។

បន្ទាប់ពីមានកិច្ចប្រជុំនៅវិមានក្រឹមឡាំង ជំនួយការជាន់ខ្ពស់របស់ប្រធានាធិបតីរុស្ស៊ី គឺលោក Yuri Ushakov បាននិយាយថា៖ «រហូតមកដល់ពេលនេះ យើងមិនទាន់រកឃើញការស្រុះស្រួលគ្នានៅឡើយទេ ប៉ុន្តែដំណោះស្រាយរបស់អាមេរិកខ្លះ អាចត្រូវបានយកទៅពិភាក្សា»។ លោកបានបន្ថែមថា៖ «ទម្រង់ដែលបានស្នើឡើងមួយចំនួន មិនត្រូវនឹងយើងទេ ហើយការងារនឹងបន្តប្រព្រឹត្តទៅ»។

លោក Trump បាននិយាយថា ដំណើរការបញ្ចប់សង្គ្រាមដែលអូសបន្លាយពេលជិត ៤ឆ្នាំ នឹងមិនងាយស្រួលនោះឡើយ។ អំឡុងកិច្ចប្រជុំគណៈរដ្ឋមន្ត្រី នៅឯសេតវិមាន លោកបានលើកឡើងថា៖ «ឥឡូវនេះ មន្ត្រីរបស់យើង បានស្ថិតនៅក្នុងប្រទេសរុស្ស៊ី ដើម្បីមើលថា តើយើងអាចដោះស្រាយវាបានដែរ ឬទេ។ ខ្ញុំសូមប្រាប់អ្នកគ្រប់គ្នាថា នេះមិនមែនជាស្ថានភាពងាយស្រួលទេ។ បញ្ហាអីក៏ស្មុគស្មាញម៉្លេះ»៕