នៅថ្ងៃពុធ (ទី៣ ខែធ្នូ) នេះ ទិន្នន័យ បានបង្ហាញថា អត្រាអតិផរណាជារួមប្រចាំឆ្នាំរបស់ប្រទេសថៃ ស្ថិតក្នុងភាពអវិជ្ជមានរយៈពេល ៨ខែជាប់គ្នា នៅក្នុងខែវិច្ឆិកា ហើយក្រសួងពាណិជ្ជកម្ម បានឲ្យដឹងថា វាបណ្ដាលមកពីការធ្លាក់ចុះតម្លៃថាមពល និងវិធានការរបស់រដ្ឋាភិបាល ក្នុងការកាត់បន្ថយការចំណាយនៃការរស់នៅ។

សន្ទស្សន៍តម្លៃអ្នកប្រើប្រាស់ជារួម បានធ្លាក់ចុះ ០,៤៩ភាគរយ ក្នុងខែវិច្ឆិកា ធៀបនឹងឆ្នាំមុន បន្ទាប់ពីបានធ្លាក់ចុះប្រចាំឆ្នាំ ០,៧៦ភាគរយ កាលពីខែមុន។ ហើយនេះក៏ជាខែទី៩ ជាប់គ្នាផងដែរ ដែលអតិផរណាស្ថិតនៅក្រោមកម្រិតគោលដៅរបស់ធនាគារកណ្តាលចន្លោះពី ១ភាគរយ ទៅ ៣ភាគរយ។

ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្ម លោក Nantapong Chiralerspong បានប្រាប់សន្និសីទសារព័ត៌មានថា ទឹកជំនន់ដ៏អាក្រក់ធ្ងន់ធ្ងរ នៅតំបន់ភាគខាងត្បូងរបស់ប្រទេស មានផលប៉ះពាល់តិចតួចដល់អតិផរណា។ ហើយក្រសួងបានឲ្យដឹងថា រង្វាស់សន្ទស្សន៍តម្លៃអ្នកប្រើប្រាស់ស្នូលបានឡើង ០,៦៦ភាគរយ ធៀបនឹងឆ្នាំមុន។

ក្នុងរយៈពេល ១១ខែដំបូងនៃឆ្នាំ២០២៥ អតិផរណាជារួម បានធ្លាក់ចុះ ០,១២ភាគរយ ធៀបនឹងរយៈពេលដូចគ្នា កាលពីឆ្នាំមុន។ ហើយលោក Nantapong បាននិយាយថា អតិផរណានៅឆ្នាំក្រោយ ត្រូវបានគេរំពឹងថា នឹងស្ថិតក្នុងចន្លោះពី ០,០ភាគរយ ទៅ ១,០ភាគរយ៕