ប្រធានាធិបតីរុស្ស៊ី លោក Vladimir Putin នឹងធ្វើដំណើរទៅប្រទេសឥណ្ឌា ក្នុងសប្តាហ៍នេះ ជាលើកដំបូង ចាប់តាំងពីមានការឈ្លានពានរបស់ទីក្រុងមូស្គូលើអ៊ុយក្រែន ដោយនេះជាការបំពេញទស្សនកិច្ចដ៏កម្រដែលបញ្ជាក់ពីទំនាក់ទំនងផ្នែកការពារជាតិ និងថាមពលរបស់ប្រទេសទាំង២ ខណៈដែលទីក្រុងញូវដេលីប្រឹងប្រែងបញ្ចប់កិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន។

មេដឹកនាំរុស្ស៊ីចង់បង្ហាញថា ទីក្រុងមូស្គូនៅតែមានទំនាក់ទំនងរឹងមាំដែលសំខាន់លើសពីលោកខាងលិច ហើយជាទីផ្សារដ៏ធំដែលខ្លួនអាចធ្វើពាណិជ្ជកម្មជាមួយ។

សម្រាប់ឥណ្ឌា ដែលមានទំនាក់ទំនងសេដ្ឋកិច្ច និងនយោបាយជិតស្និទ្ធជាមួយរុស្ស៊ី តាំងពីសម័យកាលសហភាពសូវៀត ដំណើរទស្សនកិច្ចនេះ កើតឡើងនៅពេលដែលការដាក់ទណ្ឌកម្ម និងសម្ពាធរបស់សហរដ្ឋអាមេរិក រារាំងពាណិជ្ជកម្មថាមពលដែលអំណោយផលដល់សេដ្ឋកិច្ចរបស់ខ្លួន និងមានសារៈសំខាន់ ចំពោះរុស្ស៊ី។ ហើយវាក៏ជាឱកាសមួយ ដើម្បីបង្ហាញពីការបន្តសមត្ថភាពបរបស់លោកនាយករដ្ឋមន្ត្រី Narendra Modi ក្នុងការគូសចេញនូវមាគ៌ាភូមិសាស្ត្រនយោបាយឯករាជ្យមួយ។

លោក Pramit Pal Chaudhuri ប្រធានផ្នែកប្រតិបត្តិអាស៊ីខាងត្បូងរបស់ស្ថាប័ន Eurasia Group បាននិយាយថា៖ «នៅពេលដែលសហរដ្ឋអាមេរិក ក្រោមការដឹកនាំរបស់លោក Donald Trump កាន់តែមានភាពឯកោនិយម និងមានប្រតិបត្តិការគិតតែផលប្រយោជន៍ប្រទេសខ្លួន ហើយទំនាក់ទំនងជាមួយប្រទេសចិន នៅតែមិនទាន់ប្រសើរ ឥណ្ឌាកំពុងធានាបានថា ទំនាក់ទំនងរបស់ខ្លួន ជាមួយមហាអំណាចកណ្តាលដូចជារុស្ស៊ី ឬជប៉ុន អារ៉ាប់រួម និងសហភាពអឺរ៉ុប (EU) មានភាពកាន់តែស៊ីជម្រៅ»។

មេដឹកនាំអាមេរិក លោក Trump បានដំឡើងអត្រាពន្ធលើឥណ្ឌាទ្វេដងដល់កម្រិត ៥០ភាគរយ ដើម្បីដាក់ទណ្ឌកម្មប្រទេសនេះ ពាក់ព័ន្ធនឹងការទិញប្រេងពីរុស្ស៊ី និងបានដាក់សម្ពាធលើទីក្រុងញូវដេលីឲ្យទិញអាវុធអាមេរិកបន្ថែមទៀត។ រដ្ឋាភិបាលរបស់លោក Modi កំពុងពិភាក្សាជាមួយរដ្ឋបាលរបស់លោក Trump ជុំវិញបញ្ហាពាណិជ្ជកម្ម និងជិតឈានដល់កិច្ចព្រមព្រៀងមួយ ជាគោលដៅដែលអាចពិបាកនឹងកើតឡើង បន្ទាប់ពីមានការបង្ហាញពីទំនាក់ទំនងកាន់តែជិតស្និទ្ធ រវាងឥណ្ឌា និងរុស្ស៊ី៕