បណ្ដាញសង្គម YouTube របស់ក្រុមហ៊ុន Google បានចែករំលែក «ការធ្វើបច្ចុប្ប្នភាពដ៏គួរឲ្យខកចិត្ត» ជាមួយអ្នកប្រើប្រាស់ និងអ្នកបង្កើតមាតិកាអូស្ត្រាលីរាប់លាននាក់ នៅថ្ងៃពុធ (ទី៣ ខែធ្នូ) ដោយបញ្ជក់ថា ខ្លួននឹងអនុលោមតាមបម្រាមមិនឲ្យប្រើប្រាស់បណ្ដាញសង្គមដំបូងរបស់ពិភពលោក សម្រាប់យុវវ័យ ដោយបិទអ្នកប្រើប្រាស់អាយុក្រោម ១៦ឆ្នាំចេញពីគណនីរបស់ពួកគេ ក្នុងរយៈពេលប៉ុន្មានថ្ងៃខាងមុខ។

ការសម្រេចនេះ បញ្ចប់ការមិនស្របគ្នា រវាងក្រុមហ៊ុនអ៊ីនធឺណិតលំដាប់យក្ស និងរដ្ឋាភិបាលអូស្ត្រាលី ដែលដំបូងឡើយ បានលើកលែងដល់ YouTube ពីការរឹតបន្តឹងអាយុនេះ ដោយផ្ដល់ហេរុផលពីការប្រើប្រាស់របស់បណ្ដាញសង្គមនេះ សម្រាប់គោលបំណងអប់រំ។ ក្រុមហ៊ុន Google បានប្រាប់ថា ខ្លួនកំពុងទទួលបានដំបូន្មានផ្នែកច្បាប់ អំពីរបៀបឆ្លើយតបទៅដែលត្រូវបានរួមបញ្ចូល។

ក្រុមហ៊ុនបានឲ្យដឹងនៅក្នុងសេចក្តីថ្លែងការណ៍មួយថា៖ «ឥឡូវនេះ អ្នកទស្សនាត្រូវតែមានអាយុ ១៦ឆ្នាំ ឬលើសនេះ ទើបអាចចុះឈ្មោះចូលបណ្ដាញសង្គម YouTube។ នេះគឺជាចែករំលែកនូវការធ្វើបច្ចុប្បន្នភាពដ៏គួរខកចិត្តមួយ។ ច្បាប់នេះនឹងមិនបំពេញតាមការសន្យារបស់ខ្លួន ក្នុងការធ្វើឲ្យកុមារកានតែមានសុវត្ថិភាពជាងមុននៅលើប្រព័ន្ធអ៊ីនធឺណិតនោះឡើយ ហើយតាមពិត នឹងធ្វើឲ្យកុមារអូស្ត្រាលីកាន់តែមិនសូវមានសុវត្ថិភាព នៅលើ YouTube»។

គួរបញ្ជាក់ថា បម្រាមរបស់អូស្ត្រាលី កំពុងត្រូវបានតាមមើលយ៉ាងដិតដល់ពីយុត្តាធិការផ្សេងទៀតដែលពិចារណាលើនីតិវិធីផ្អែកលើអាយុស្រដៀងគ្នា ដោយបង្កើតបាននូវលទ្ធភាពនៃការមានគំរូសកល សម្រាប់របៀបដែលក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក ភាគច្រើននៅពីក្រោយកម្មវិធីធំបំផុតជាងគេរបស់បណ្ដាញសង្គម ថ្លឹងថ្លែងពីសុវត្ថិភាពរបស់កុមារ ពេលអនុញ្ញាតឲ្យចូលប្រើប្រាស់សេវាកម្មឌីជីថល៕