អាជ្ញាធរលីប៊ីបាននិយាយកាលពីថ្ងៃអង្គារថា ពួកគេនឹងបង្កើនការបញ្ជូនជនអន្តោប្រវេសន៍មិនទៀងទាត់ ភាគច្រើន មកពីអាហ្វ្រិកអនុតំបន់សាហារ៉ាត្រឡប់ទៅប្រទេសរបស់ពួកគេវិញ ដោយព្រមានប្រឆាំងនឹងការតាំងទីលំនៅរបស់ពួកគេ នៅក្នុងប្រទេសលីប៊ី ខណៈដែលអឺរ៉ុបជំរុញកិច្ចខិតខំប្រឹងប្រែង ដើម្បីទប់ស្កាត់ការមកដល់។

ដោយមានចម្ងាយប្រហែល ៣០០ គីឡូម៉ែត្រ (១៨៦ ម៉ាយ) ប្រទេសលីប៊ីបានក្លាយជាកន្លែងចាប់ផ្តើមដ៏សំខាន់សម្រាប់ជនអន្តោប្រវេសន៍រាប់ម៉ឺននាក់ ដែលប្រថុយជីវិតរបស់ពួកគេនៅលើសមុទ្រ ដោយព្យាយាមទៅដល់អឺរ៉ុបជារៀងរាល់ឆ្នាំ។

រដ្ឋមន្ត្រីក្រសួងមហាផ្ទៃលោក Imad Trabelsi បានថ្លែងនៅក្នុងសន្និសីទសារព័ត៌មានមួយ នៅទីក្រុងទ្រីប៉ូលី រួមជាមួយឯកអគ្គរដ្ឋទូតបរទេសជាច្រើនរូប និងបានជំរុញឲ្យសហភាពអឺរ៉ុប សហភាពអាហ្វ្រិក និងប្រទេសអារ៉ាប់ផ្សេងទៀត គាំទ្របន្ថែមទៀត។

លោកបាននិយាយថា លីប៊ីបានទទួលជំនួយ «មានកម្រិតណាស់» បើប្រៀបធៀបទៅនឹង «ការប្តេជ្ញាចិត្តដ៏សំខាន់»របស់ខ្លួន ក្នុងការដោះស្រាយបញ្ហានេះ។

សហភាពអឺរ៉ុបបាននិយាយថា ខ្លួនបានចំណាយប្រាក់ប្រហែល ៤៦៥ លានអឺរ៉ូ (៥៤០ លានដុល្លារ) លើប្រទេសលីប៊ី ក្នុងវិស័យអន្តោប្រវេសន៍នៅចន្លោះឆ្នាំ ២០១៥ ដល់ឆ្នាំ ២០២១ ខណៈដែល ៦៥ លានអឺរ៉ូទៀត ត្រូវបានបែងចែកសម្រាប់ «ការការពារ និងការគ្រប់គ្រងព្រំដែន» នៅក្នុងប្រទេសលីប៊ី ចាប់ពីឆ្នាំ ២០២១ ដល់ឆ្នាំ ២០២៧៕