សម្រាប់ការបោះឆ្នោតប្រធានាធិបតីរបស់ប្រទេសហុងឌូរ៉ាស លោក Salvador Nasralla មកពីក្រុមកណ្តាលនិយម គឺគណបក្សសេរីនិយម កាលពីថ្ងៃអង្គារ (ទី២ ខែធ្នូ) បាននាំមុខក្នុងសំឡេងដ៏ស្ដួចស្ដើងលើលោក Nasry Asfura ជាបេក្ខជនអភិរក្សនិយមដែលគាំទ្រដោយប្រធានាធិបតីសហរដ្ឋអាមេរិក លោក Donald Trump ខណៈដែលការរាប់សន្លឹកឆ្នោតញាំញីដោយការពន្យារពេល និងការចោទប្រកាន់ ដែលថា មានការក្លែងបន្លំ។

លទ្ធផលចុងក្រោយដែលចេញដោយអាជ្ញាធររៀបចំការបោះឆ្នោតនៅវេលាម៉ោង ៦ល្ងាច ម៉ោងក្នុងស្រុក (ត្រូវនឹងម៉ោង ១ ម៉ោងសកល នៅថ្ងៃពុធ) បានបង្ហាញថា លោក Nasralla ទទួលបានសន្លឹកឆ្នោត ៤០,១៣ភាគរយ ហើយលោក Asfura របស់គណបក្សជាតិ មាន ៣៩,៧១ភាគរយ ក្រោយរាប់បានប្រហែល ៦៨ភាគរយ។ អ្នកនាំមុខ មានសន្លឹកឆ្នោតលើសតែ ៩.១២៩សំឡេងប៉ុណ្ណោះ។ នៅមុននេះ លោក Asfura បាននាំមុខជាមួយនឹងសន្លឹកឆ្នោតប្រហែល ៥០០សំឡេង នៅពេលដែលលទ្ធផលពីមុន ត្រូវបានចេញផ្សាយកាលពីថ្ងៃចន្ទ។

ចំណែកលោកស្រី Rixi Moncada ទៅពីគណបក្សឆ្វេងនិយម LIBRE ដែលកំពុងកាន់អំណាច ស្ថិតនៅលំដាប់ទី៣ ដោយទទួលបានសំឡេងឆ្នោត ១៩,០៩ភាគរយ។ 

កាលពីព្រឹកថ្ងៃអង្គារ អាជ្ញាធររៀបចំការបោះឆ្នោតរបស់ប្រទេសហុងឌូរ៉ាស បានសុំឲ្យមានភាពស្ងប់ស្ងាត់ ខណៈដែលខ្លួនបានប្រឹងប្រែងជម្នះលើបញ្ហាប្រព័ន្ធដែលបានធ្វើឲ្យសន្លឹកឆ្នោតប្រហែល ២០ភាគរយ នៅក្នុងការបោះឆ្នោតប្រធានាធិបតីនេះ មិនត្រូវបានរាប់បញ្ចូល ខណៈដែលលោក Trump បានចោទប្រកាន់ថា អាចមានការក្លែងបន្លំ ហើយបានប្ដេជ្ញាថា «នឹងមានផលអាក្រក់កើតឡើងជាមិនខាន» ប្រសិនបើលទ្ធផលត្រូវបានផ្លាស់ប្តូរ៕