អគ្គលេខាធិការអង្គការណាតូលោក Mark Rutte និយាយនៅថ្ងៃពុធនេះថា វាជាការល្អកាលដែលកិច្ចប្រជុំសន្តិភាពបញ្ចប់សង្រ្គាមអ៊ុយក្រែននៅបន្ត ប៉ុន្តែវាចំាបាច់ធ្វើឲ្យប្រាកដថា អ៊ុយក្រែនស្ថិតក្នុងជំហរខ្លាំងបំផុតតាមដែលអាចធ្វើបាន ។

សេចក្តីអត្ថាធិប្បាយរបស់លោក Rutte បានកើតមានឡើង ស្របពេលដែលក្រុមរដ្ឋមន្រ្តីការបរទេសអង្គការណាតូ ធ្វើដំណើរមកដល់សម្រាប់ជំនួបនៅទីស្នាក់ការកណ្តាលសម្ព័ន្ធមិត្តយោធាមួយនេះ ស្ថិតនៅទីក្រុងព្រុចសែល ប្រទេសបែលហ្ស៊ិក ដើម្បីពិភាក្សាអាទិភាពរបស់សម្ព័ន្ធមិត្ត និងបញ្ហាសន្តិសុខ ជាពិសេសបញ្ហាសង្រ្គាមនៅអ៊ុយក្រែន ។

លោក Rutte និយាយផងដែរថា លោកបានទាក់ទងឥតឈប់ឈរជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio និងក្រុមការងាររបស់លោក ។

លោកថា លោក Rubio កំពុងធ្វើការខ្លាំង ពេលដែលវាកើតឡើងចំពោះដំណើរការសន្តិភាពអ៊ុយក្រែន ប៉ុន្តែវាកើតឡើងផងដែរចំពោះស៊ូដង់ ហ្កាហ្សា និងបញ្ហាទាំងអស់ផ្សេងទៀតដែលអាមេរិក កំពុងធ្វើ ។ ដូច្នេះហើយលោកយល់ឃើញថា វាពិតជាអាចទទួលយកបាន កាលដែលលោក Rubio គ្មានវត្តមាននៅទីនេះ ។

លោក Rutteបញ្ជាក់ថា វាសំខាន់ខ្លាំងណាស់កាលដែលដំណើរការសន្តិភាពមាននៅទីនោះ សង្ឃឹមថាវានឹងនាំឲ្យមានលទ្ធផលទៅចុះ ហើយបើសិនជាវាត្រូវការចំណាយពេលយូរ ឬពុំនាំឲ្យមានលទ្ធផល មធ្យោបាយល្អបំផុត គឺត្រូវដាក់សម្ពាធរុស្ស៊ី តាមរយៈការធ្វើរឿង ២ ។ ទី ១ ត្រូវប្រាកដថា រុស្ស៊ីគួរយល់ថា លំហូរអាវុធចូលអ៊ុយក្រែន នឹងបន្ត នោះគឺជាអ្វីដែលកំពុងកើតឡើងនៅថ្ងៃនេះ ដោយសារអាមេរិក និងដោយសារអឺរ៉ុប ។ ទី ២ ត្រូវប្រាកដថា ទណ្ឌកម្មសេដ្ឋកិច្ចត្រូវតែវាយប្រហារ វាត្រូវតែមានប្រសិទ្ធិភាព ដូចអ្វីដែលកំពុងកើតឡើងនៅពេលនេះ ៕