លោកស្រី Rebeca Grynspan ដែលជាអតីតអនុប្រធានាធិបតីកូស្តារីកា និងជាគូប្រជែងឈានមុខគេ ដើម្បីក្លាយជាអគ្គលេខាធិការបន្ទាប់របស់អង្គការសហប្រជាជាតិ(UN) និយាយថា បើសិនជាសមភាពឈ្នះការរើសអើង ទីបញ្ចប់អង្គការពិភពលោកមួយនេះ នឹងមើលឃើញស្រ្តីលើកដំបូងដឹកនាំពួកគេ ។

 ដំណើរការជ្រើសរើសប្រមុខ UNបន្ទាប់ បានចាប់ផ្តើមជាផ្លូវការកាលពីសប្តាហ៍មុន ពេលដែលរដ្ឋជាសមាជិក ត្រូវបានស្នើសុំឲ្យតែងតាំងបេក្ខជនរបស់ពួកគេ ដើម្បីទទួលយកតំណែងបន្តពីលោក Antonio Guterres មកពីព័រទុយហ្គាល់ ចាប់ពីថ្ងៃទី ១ ខែមករា ឆ្នាំ ២០២៧ខាងមុខ ។

 បើទោះបីជាប្រវត្តិសាស្រ្តរយៈពេល ៨០ឆ្នាំរបស់ UNជាទីភ្នាក់ងារអន្តរជាតិសម្រាប់សន្តិភាព និងកិច្ចសហប្រតិបត្តិការ តំណែងអគ្គលេខាធិការពុំធ្លាប់ដែលកាន់កាប់ដោយស្រ្តីយ៉ាងណាក៏ដោយ ការពិតមួយដែលលោកស្រី Grynspan និយាយ គឺមិនអាចពន្យល់បាន ដោយសារមានស្ត្រីប៉ុន្មាននាក់ដែលមានគុណសម្បត្តិ និងសមត្ថភាពគ្រប់គ្រាន់ ដើម្បីដឹកនាំអង្គការមួយនេះ ។

 បេក្ខជនប្រកាសជាផ្លូវការរសម្រាប់តំណែងមួយនេះ រួមមានទាំងលោកស្រី Grynspan ដែលបច្ចុបប្បន្នបម្រើការជាអគ្គលេខាធិការអង្គការអភិវឌ្ឍន៍ និងពាណិជ្ជកម្ម UN អតីតប្រធានាធិបតីឈីលីលោក Michelle Bachelet និងមន្រ្តីការទូតអាហ្សង់ទីនលោក Rafael Grossi ។

 លោកស្រី Grynspan វ័យ ៦៩ឆ្នាំ និយាយប្រាប់ទីភ្នាក់ងារព័ត៌មានរ៉យទ័រ អំឡុងបទសម្ភាសន៍នៅទីក្រុងឡុងដ្រ៍ថា ពួកយើងមិនត្រូវការធ្វើអ្វីពិសេសនោះទេ ។ អ្វីដែលពួកយើងសុំ គឺមិនរើសអើង ។

 លោកស្រីថា បើសិនជាសមភាពឈ្នះ ពួកយើងនឹងអាចទទួលបានមុខងារនេះ នោះហើយគឺជាអ្វីតែមួយគត់ដែលពួកយើងសុំ គឺការធ្វើឲ្យស្មើភាពគ្នា ៕