សមាជិកសភា និងរដ្ឋជាសមាជិករបស់សហភាពអឺរ៉ុប (EU) បានឈានដល់កិច្ចព្រមព្រៀងមួយ កាលពីថ្ងៃពុធ (ទី3 ខែធ្នូ) ដើម្បីហាមឃាត់ការនាំចូលឧស្ម័នទាំងអស់ពីរុស្ស៊ី នៅត្រឹមរដូវស្លឹកឈើជ្រុះឆ្នាំ២០២៧ ខណៈដែលប្លុកនេះប្រឹងប្រែងបិទខ្ទប់មូលនិធិសំខាន់ៗដែលទ្រទ្រង់ធនធានធ្វើសង្រ្គាមរបស់ទីក្រុងមូស្គូ។

កិច្ចព្រមព្រៀងដែលកើតឡើងនាពេលយប់ មានគោលបំណងកាត់ផ្ដាច់ការពឹងផ្អែកដែលប្លុកនេះ បានជួបនឹងការលំបាក ក្នុងការបញ្ចប់ ទោះបីជាមានការឈ្លានពានលើអ៊ុយក្រែនក៏ដោយ ហើយបង្ហាញពីការសម្របសម្រួល រវាងរដ្ឋជាសមាជិក EU និងសភាអឺរ៉ុប ដែលចង់ឲ្យការហាមឃាត់នេះកើតឡើងយ៉ាងឆាប់រហ័ស។

ស្នងការថាមពល EU លោក Dan Jorgensen បានសរសេរនៅលើបណ្ដាញសង្គម X ថា៖ «យើងបានសម្រេចបានហើយ។ អឺរ៉ុបកំពុងបញ្ឈប់លំហូរឧស្ម័នរុស្ស៊ីជារៀងរហូត។ យើងបានជ្រើសរើសសន្តិសុខ និងឯករាជ្យថាមពល សម្រាប់អឺរ៉ុប។ គ្មានការសម្លុតកំហែងទៀតទេ។ គ្មានឧបាយកលទីផ្សាររបស់លោក (Vladimir) Putin ទៀតទេ។ យើងឈរយ៉ាងរឹងមាំជាមួយអ៊ុយក្រែន»។

នៅក្រោមកិច្ចព្រមព្រៀងនេះ កិច្ចសន្យាបំពង់បង្ហូរប្រេងរយៈពេលវែង ដែលត្រូវបានចាត់ទុកថា មានភាពរសើបបំផុត ព្រោះពួកវាអាចដំណើរការជាច្រើនទសវត្សរ៍នោះ នឹងត្រូវបានហាមឃាត់ចាប់ពីថ្ងៃទី៣០ ខែកញ្ញា ឆ្នាំ២០២៧ ដែលការផ្តល់កម្រិតស្តុក គឺគ្រប់គ្រាន់ ហើយមិនលើសពីថ្ងៃទី១ ខែវិច្ឆិកា ឆ្នាំ២០២៧ ទេ។

សម្រាប់ឧស្ម័នធម្មជាតិរាវ (LNG) កិច្ចសន្យារយៈពេលវែង នឹងត្រូវបានហាមឃាត់ចាប់ពីថ្ងៃទី១ ខែមករា ឆ្នាំ២០២៧ ស្របតាមការអំពាវនាវរបស់ប្រធានគណៈកម្មការ លោកស្រី Ursula von der Leyen ដើម្បីធ្វើឲ្យទណ្ឌកម្មរឹតតែតឹងរ៉ឹង លើទីក្រុងមូស្គូ។ កិច្ចសន្យារយៈពេលខ្លី នឹងត្រូវបានលុបចោលលឿនជាង ចាប់ពីថ្ងៃទី២៥ ខែមេសា ឆ្នាំ២០២៦ សម្រាប់ LNG និងថ្ងៃទី១៧ ខែមិថុនា ឆ្នាំ២០២៦ សម្រាប់ឧស្ម័នតាមបំពង់បង្ហូរ៕