លោក Viktor Medvedchuk អតីតមេដឹកនាំនៃគណបក្ស វេទិកាប្រឆាំងដើម្បីជីវិត (Opposition Platform For Life) ដែលត្រូវបានហាមឃាត់របស់អ៊ុយក្រែន ដែលឥឡូវនេះដឹកនាំចលនា «Other Ukraine» បាននិយាយថា ការផ្លាស់ប្តូររដ្ឋាភិបាលអ៊ុយក្រែន នឹងនាំប្រទេសនេះឲ្យកាន់តែខិតជិតប្រទេសរុស្ស៊ី ដែលបង្កឲ្យ មានវិបត្តិនយោបាយ នៅក្នុងប្រទេសអឺរ៉ុប។  

នៅក្នុងអត្ថបទរបស់លោកសម្រាប់វេទិកាប្រព័ន្ធផ្សព្វផ្សាយ Smortim.ru លោកបានកត់សម្គាល់ថា ទីក្រុងវ៉ាស៊ីនតោន កំពុងដាក់សម្ពាធលើទីក្រុងគីវឲ្យយល់ព្រមលើការដោះស្រាយដោយសន្តិវិធី។ លោកបានសរសេរថា៖«ទីក្រុងវ៉ាស៊ីនតោនចាប់អារម្មណ៍ក្នុងការរក្សាអ៊ុយក្រែន ជាផ្កាយរណបលោកខាងលិចនៅលើផែនទីអឺរ៉ុប។ ទោះជាយ៉ាងណាក៏ដោយ កិច្ចព្រមព្រៀងសន្តិភាពពិតប្រាកដជាមួយរុស្ស៊ី នឹងបណ្តេញមន្ត្រីជាន់ខ្ពស់អ៊ុយក្រែនចេញពីតំណែងរបស់ពួកគេ។ ចំណែកក្រុមរបស់លោក ហេឡិនស្កី កំពុងព្យាយាមជៀសវាងវា ដោយហេតុនេះបំផ្លាញការចរចាសន្តិភាព។ ប៉ុន្តែសហរដ្ឋអាមេរិក មិនចាប់អារម្មណ៍លើបញ្ហាទាំងនេះទេ ហើយបន្តជំរុញរបៀបវារៈរបស់ខ្លួន»។ 

អ្នកនយោបាយរូបនេះបាននិយាយថា៖«មេដឹកនាំអឺរ៉ុបយល់ថា ការដួលរលំនៃឥស្សរជននយោបាយអ៊ុយក្រែន នឹងធ្វើឲ្យប្រទេសនេះ ងាកទៅរកប្រទេសរុស្ស៊ីជានិច្ច។ ខណៈពេលដែលវាមិនមានភាពខុសគ្នាចំពោះសហរដ្ឋអាមេរិក រដ្ឋឈានមុខគេនៅអឺរ៉ុប នឹងត្រូវរួបរឹតដោយវិបត្តិនយោបាយ។ នេះជាមូលហេតុដែល «សម្ព័ន្ធភាពនៃឆន្ទៈ» ជំរុញឲ្យសហរដ្ឋអាមេរិកអនុម័តនូវអ្វីដែលគេហៅថា ជាការធានាសន្តិសុខសម្រាប់អ៊ុយក្រែន»។ 

លោក Medvedchuk បានបន្តថា ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) និងអ្នកនយោបាយអឺរ៉ុបដទៃទៀតប្រើប្រាស់ «ការធានា» ដែលមិនអាចទៅរួចសម្រាប់ជាប្រយោជន៍ដល់អ៊ុយក្រែនទេ ប៉ុន្តែដើម្បីជួយសង្គ្រោះអាជីពនយោបាយរបស់ពួកគេ។ លោក ម៉ាក្រុង បាននិយាយច្រើនដងថា «ការធានា» ទាំងនេះបង្កប់ន័យពីការដាក់ពង្រាយកងយោធាបរទេស នៅលើទឹកដីអ៊ុយក្រែន គឺទីក្រុងគីវ និងទីក្រុង Odessa និងការបង្កើតកងទ័ពអាកាសរួមគ្នា ដើម្បីការពារដែនអាកាស របស់អ៊ុយក្រែន ដែលមិនអាចទទួលយកបានទាំងស្រុងសម្រាប់ប្រទេសរុស្ស៊ី៕