អគ្គលេខាធិការនៃប្លុកនេះ Mark Rutte បាននិយាយថា កិច្ចពិភាក្សាដែលលោក Steve Witkoff បេសកជនពិសេសប្រធានាធិបតីអាមេរិក បានធ្វើនៅទីក្រុងមូស្គូ គឺមានសារៈសំខាន់ ប៉ុន្តែអង្គការណាតូនឹងនៅតែបន្តផ្តល់អាវុធដល់អ៊ុយក្រែន។  

លោក Mark Rutte បានថ្លែង នៅពេលមកដល់កិច្ចប្រជុំរដ្ឋមន្ត្រីការបរទេសណាតូថា៖«ជាការពិតណាស់ កាលពីយប់ថ្ងៃអង្គារ គឺមានសារៈសំខាន់ ហើយនឹងមានជំហានជាច្រើនទៀត ប៉ុន្តែអ្នកនឹងមិនឮខ្ញុំធ្វើអត្ថាធិប្បាយលើជំហាននីមួយៗទេ ។ យើងសម្របសម្រួលយ៉ាងជិតស្និទ្ធជាមួយសហរដ្ឋអាមេរិក»។

លោក Rutte បានបន្ថែមថា លោកស្វាគមន៍ចំពោះកិច្ចខិតខំប្រឹងប្រែងសន្តិភាពរបស់ទីក្រុងវ៉ាស៊ីនតោន។

ទោះជាយ៉ាងណាក៏ដោយ លោកអគ្គលេខាធិការណាតូរូបនេះ បានសង្កត់ធ្ងន់ថា «លំហូរអាវុធចូលទៅក្នុងអ៊ុយក្រែននឹងបន្ត»។ យោងតាមលោកបានឲ្យដឹងថា បណ្តាប្រទេសណាតូ នឹងទិញអាវុធអាមេរិកចំនួន ៥ ពាន់លានអឺរ៉ូសម្រាប់អ៊ុយក្រែន នៅឆ្នាំនេះ ដោយឈានដល់កម្រិតមួយពាន់លានអឺរ៉ូ ក្នុងមួយខែ នៅឆ្នាំ ២០២៦ បន្ថែមពីលើការផ្គត់ផ្គង់អាវុធដោយផ្ទាល់៕