គណបក្សការងារដែលកំពុងកាន់អំណាចរបស់ប្រទេសន័រវ៉ែស នៅថ្ងៃពុធ (ទី៣ ខែធ្នូ) នេះ បានឲ្យដឹងថា ខ្លួនបានឈានដល់កិច្ចព្រមព្រៀងជាមួយគណបក្សឆ្វេងនិយមចំនួន ៤ នៅក្នុងសភា ជុំវិញថវិកាសារពើពន្ធឆ្នាំ២០២៦ ដោយបានបញ្ចប់ការប្រឈមមុខដាក់គ្នាដែលបានគំរាមធ្វើឲ្យគណៈរដ្ឋមន្ត្រីរបស់លោកនាយករដ្ឋមន្ត្រី Jonas Gahr Stoere ដួលរលំ។

កិច្ចព្រមព្រៀងនេះ ដែលមិនរាប់បញ្ចូលការទាមទារឲ្យមានការបញ្ឈប់ជាបណ្តើរៗនូវប្រើប្រាស់ប្រេង និងការដកភាគហ៊ុន នៅក្នុងក្រុមហ៊ុនអ៊ីស្រាអែល បានកើតឡើងមុនការបោះឆ្នោតអនុម័តកញ្ចប់ថវិកាដែលគ្រោងនឹងធ្វើនៅថ្ងៃសុក្រ។ ប្រសិនបើរដ្ឋាភិបាលមិនទទួលបានសំឡេងឆ្នោតគាំទ្រទេនោះ វានឹងជំរុញឲ្យនាយករដ្ឋមន្ត្រីប្រកាសការបោះឆ្នោតដកសេចក្ដីទុកចិត្ត។

គណបក្សការងារបានឈ្នះអាណត្តិទី២ នៅក្នុងការបោះឆ្នោត កាលពីខែកញ្ញា ប៉ុន្តែលទ្ធផលបានធ្វើឲ្យគណបក្សនេះពឹងផ្អែកលើគណបក្សឆ្វេងនិយមតូចៗចំនួន៤ ដើម្បីឲ្យកញ្ចប់ថវិកាទទួលបានការអនុម័ត។

អ្នកវិទ្យាសាស្ត្រនយោបាយ នៅវិទ្យាស្ថានស្រាវជ្រាវសង្គមដែលមានមូលដ្ឋាន នៅទីក្រុង Oslo គឺលោក Johannes Bergh បានប្រាប់សារព័ត៌មានថា៖ «ក្រុមនៃគណបក្សដែលគណបក្សការងារពឹងផ្អែកលើ គឺជាក្រុមផ្សេងៗគ្នា។ ចាប់តាំងពីការបោះឆ្នោតមក វាគឺតែងតែច្បាស់លាស់ ដែលថា វានឹងជាការពិបាកខ្លាំងណាស់ ដែលគណបក្សកណ្ដាល-ឆ្វេងនិយមទាំង៥ ឈានដល់កិច្ចព្រមព្រៀង លើកញ្ចប់ថវិកា»។

បញ្ហាចំនួន ២ បាននាំឲ្យមានការខ្វែងគំនិតគ្នា នៅក្នុងការចរចា។ ទី១ គណបក្សឆ្វេងនិយមសង្គមនិយម (SV) ទាមទារថា មូលនិធិទ្រព្យសម្បត្តិអធិបតេយ្យចំនួន ២សែនកោដិដុល្លាររបស់ប្រទេសន័រវ៉ែស ជាចំនួនដ៏ច្រើនបំផុតរបស់ពិភពលោក គួរតែដកចេញពីក្រុមហ៊ុនអ៊ីស្រាអែលទាំងអស់ ជាការទាមទារដែលគណបក្សការងារ បានបដិសេធ។ ការច្រានចោលនោះបានធ្វើឡើងបន្ទាប់ពីកិច្ចពិភាក្សាបានបញ្ចប់នៅព្រឹកថ្ងៃពុធ។

បញ្ហាផ្សេងទៀត គឺការទាមទាររបស់គណបក្សបៃតង (MDG) ឲ្យបញ្ឈប់ជាបណ្តើរៗនូវឧស្សាហកម្មប្រេង ក្នុងឆ្នាំ២០៤០។ ន័រវ៉ែសគឺជាអ្នកផ្គត់ផ្គង់ឧស្ម័នធំជាងគេបំផុតរបស់អឺរ៉ុប និងជាប្រទេសនាំចេញប្រេងដ៏សំខាន់។ ការចង់បាននោះក៏នឹងមិនកើតឡើងដូចគ្នាដែរ៕