ប្រទេសស៊ីរី នៅថ្ងៃពុធ (ទី៣ ខែធ្នូ) នេះ បានសរសើរការគាំទ្រជាអន្តរជាតិកាន់តែខ្លាំងឡើងៗ ចំពោះសេចក្ដីសម្រេចរបស់មហាសន្និបាតអង្គការសហប្រជាជាតិ (UNGA) ស្តីពីតំបន់កាន់កាប់ Golan Heights ដោយបញ្ជាក់ថា ការគាំទ្រពីប្រទេសចំនួន ១២៣ តំណាងឲ្យ «ការគាំទ្រដ៏រឹងមាំ សម្រាប់ស៊ីរីថ្មី»។

កាលពីល្ងាចថ្ងៃអង្គារ មហាសន្និបាត បានអនុម័តសេចក្តីសម្រេចមួយ ដែលអំពាវនាវឲ្យអ៊ីស្រាអែលដកកងកម្លាំងចេញពីតំបន់ Golan Heights របស់ស៊ីរី ដោយបញ្ជាក់ជាថ្មីថា ការកាន់កាប់ និងការបញ្ចូលជាដែនដីឧបសម្ព័ន្ធរបស់អ៊ីស្រាអែល គឺ «ខុសច្បាប់»។ ការបោះឆ្នោតទទួលបានអនុម័ត ដោយមានសំឡេងគាំទ្រ ១២៣ ទល់នឹង ៧ ជាសំឡេងជំទាស់ដែលរួមមានទាំងអ៊ីស្រាអែល និងសហរដ្ឋអាមេរិកផងដែរ ហើយ ៤១សំឡេងអនុបវាទ។

ក្រសួងការបរទេសស៊ីរីបានលើកឡើងនៅក្នុងសេចក្តីថ្លែងការណ៍ថា ការបោះឆ្នោតនេះ «គាំទ្រយ៉ាងច្បាស់លាស់ដល់ជំហររបស់ស៊ីរី ពីព្រោះសេចក្ដីសម្រេច ពិពណ៌នាអំពីការបន្តកាន់កាប់របស់អ៊ីស្រាអែល លើតំបន់ Golan Heights ថា ជាឧបសគ្គក្នុងការសម្រេចបាននូវសន្តិភាពដ៏ត្រឹមត្រូវ និងគ្រប់ជ្រុងជ្រោយនៅក្នុងតំបន់នេះ»។

សេចក្តីថ្លែងការណ៍បានបន្ថែមថា ការកើនឡើងនូវការគាំទ្រពី ៩៧សំឡេង កាលពីឆ្នាំមុន រហូតដល់ ១២៣សំឡេង នៅឆ្នាំនេះ «បង្ហាញពីទំហំនៃការគាំទ្រជាអន្តរជាតិយ៉ាងទូលំទូលាយ សម្រាប់ប្រទេសស៊ីរីថ្មី និងគោលជំហរជាតិជាគោលការណ៍របស់ខ្លួន លើតំបន់កាន់កាប់ Golan Heights»។

ក្រសួងបានសង្កត់ធ្ងន់ថា ការបោះឆ្នោតនេះឆ្លុះបញ្ចាំងពី «កិច្ចប្រឹងប្រែងការទូតយ៉ាងខ្លាំងក្លា» ដោយកត់សម្គាល់ថា សេចក្ដីសម្រេចនេះអំពាវនាវឲ្យអ៊ីស្រាអែលដកកងកម្លាំងត្រឡប់ទៅខ្សែបន្ទាត់ព្រំដែន កាលពីថ្ងៃទី៤ ខែមិថុនា ឆ្នាំ១៩៦៧ និងបញ្ជាក់ឡើងវិញនូវគោលការណ៍ ដែលថា ដែនដីមិនអាចត្រូវបានដណ្ដើមកាន់ដោយកម្លាំងនោះឡើយ។ ហើយសេចក្ដីសម្រេចនោះក៏បដិសេធផងដែរមិនឲ្យមានការសាងសង់ទីលំនៅ និងសកម្មភាពផ្សេងទៀតទាំងអស់របស់អ៊ីស្រាអែល នៅក្នុងតំបន់កាន់កាប់ Golan Heights៕