រដ្ឋមន្ត្រីការបរទេសទួរគី Hakan Fidan និងអគ្គលេខាធិការអង្គការណាតូ (NATO) លោក Mark Rutte បានពិភាក្សាគ្នា អំពីសុវត្ថិភាពសមុទ្រខ្មៅ នៅថ្ងៃពុធ (ទី៣ ខែធ្នូ) នេះ បន្ទាប់ពីទីក្រុងអង់ការ៉ា បានសម្តែងក្ដីបារម្ភ ចំពោះការវាយប្រហារលើនាវាដឹកប្រេងពាក់ព័ន្ធជាមួយរុស្ស៊ី ដែលអ្នកខ្លះអះអាងធ្វើឡើងដោយអ៊ុយក្រែន។

ជាសមាជិករបស់អង្គការណាតូ ទីក្រុងអង់ការ៉ាដែលបានបន្តរក្សាទំនាក់ទំនងយ៉ាងកក់ក្តៅជាមួយភាគីទាំង២ ក្នុងសង្គ្រាមរុស្ស៊ី នៅអ៊ុយក្រែន បានថ្កោលទោសការវាយប្រហារលើនាវាមានទំនាក់ទំនងជាមួយទីក្រុងមូស្គូ ជាហេតុការណ៍ដែលបានកើតឡើងនៅក្នុងតំបន់សេដ្ឋកិច្ចផ្តាច់មុខរបស់ទួរគី ម្ដុំឆ្នេរសមុទ្ររបស់ខ្លួន ក្នុងសមុទ្រខ្មៅ។

ការវាយប្រហារនេះបានធ្វើឲ្យអត្រាធានារ៉ាប់រងលើការដឹកជញ្ជូនសមុទ្រខ្មៅឡើងកាន់តែខ្ពស់ ហើយបានជំរុញឲ្យក្រុមហ៊ុនទួរគីឈ្មោះថា Besiktas Shipping បញ្ឈប់ប្រតិបត្តិការពាក់ព័ន្ធជាមួយរុស្ស៊ី ដោយសារបារម្ភពីបញ្ហាសន្តិសុខ។

អ៊ុយក្រែន ដែលកំពុងកំណត់គោលដៅនាំចេញប្រេងរបស់រុស្ស៊ី ខណៈដែលទីក្រុងមូស្គូ ទម្លាក់គ្រាប់បែកលើបណ្តាញថាមពលរបស់ខ្លួន បានទទួលខុសត្រូវ ចំពោះការវាយប្រហារដោយយានដ្រូននៅសមុទ្រ លើនាវាដឹកប្រេងទទេចំនួន ២គ្រឿង ដែលកំពុងធ្វើដំណើរឆ្ពោះទៅកាន់កំពង់ផែរុស្ស៊ី កាលពីសប្តាហ៍មុន។

តែទីក្រុងគីវ បានបដិសេធមិនមានការពាក់ព័ន្ធណាមួយនឹងឧប្បត្តិហេតុផ្សេងទៀត កាលពីថ្ងៃអង្គារ ដែលនាវាដឹកប្រេងមានទង់ជាតិរុស្ស៊ីផ្ទុកប្រេងផ្កាឈូករ័ត្ន បានប្រាប់ថា ខ្លួនបានស្ថិតក្រោមការវាយប្រហារដោយយានដ្រូន នៅម្ដុំឆ្នេរសមុទ្រទួរគី។ ក្រៅពីតំបន់សមុទ្រខ្មៅ នាវាដឹកប្រេង Besiktas Shipping ១គ្រឿងទៀត ដែលធ្វើជំនួញជាមួយរុស្ស៊ីដែរ ត្រូវបានធ្វើខូចខាត នៅជិតប្រទេសសេណេហ្គាល់ ដោយសារការវាយប្រហារពីខាងក្រៅ។ គ្មាននរណាម្នាក់ចេញមកអះអាងទទួលខុសត្រូវឡើយ សម្រាប់ហេតុការណ៍នេះ៕