នគរបាលបានឲ្យដឹងនៅថ្ងៃពុធ (ទី៣ ខែធ្នូ) នេះថា ចំនួនអ្នកស្លាប់ ដោយសារអគ្គិភ័យដ៏អាក្រក់បំផុតជាលើកដំបូងក្នុងរយៈពេលជាច្រើនទស្សវត្សរ៍មកនេះ នៅទីក្រុងហុងកុង បានកើនឡើងដល់ ១៥៩នាក់យ៉ាងតិច បន្ទាប់ពីប្លុកលំនៅឋានដែលរងផលប៉ះពាល់ទាំងអស់ត្រូវបានស្វែងរក តែអាជ្ញាធរបានព្រមានថា នេះអាចនឹងមិនមែនជាតួលេខចុងក្រោយនោះឡើយ។

គួរបញ្ជាក់ថា អគ្គិភ័យនេះ បានចាប់ផ្ដើមឆាបឆេះឡើងកាលពីថ្ងៃពុធសប្តាហ៍មុន ហើយបានរាលដាលនៅប្លុកអគារ Wang Fuk Court ក្នុងសង្កាត់ Tai Po ភាគខាងជើង ដោយបានក្លាយជាការឆាបឆេះអគារលំនៅឋានបណ្ដាលឲ្យមានមនុស្សស្លាប់ច្រើនបំផុត នៅលើពិភពលោក គិតចាប់តាំងពីឆ្នាំ១៩៨០ មក។

ដោយពណ៌នាព័ត៌មានថា គ្រាន់តែជា «ការសរុបបណ្តោះអាសន្ន» បន្ទាប់ពីបញ្ចប់ការស្វែងរកនៅតាមប្លុកអគារនោះ ស្នងការនគរបាល លោក Joe Chow បានប្រាប់សន្និសីទសារព័ត៌មានថា៖ «យើងបានរកឃើញសាកសពចំនួន ១៥៩នាក់ ដែល ១៤០នាក់ ត្រូវបានកំណត់អត្តសញ្ញាណផ្អែកមូលដ្ឋានបឋម»។

លោកបានបញ្ជាក់ថា ចំនួនអ្នកស្លាប់អាចនៅតែប្រែប្រួល ខណៈដែលក្រុមមន្រ្តី បានរកឃើញ «ឆ្អឹងដែលសង្ស័យថា ជារបស់មនុស្ស» ដែលតម្រូវឲ្យមានការធ្វើតេស្ដកោសល្យវិច័យ។ លោក Chow បានបន្ថែមថា អ្នកស្លាប់រួមមានស្ត្រី ៩១នាក់ និងបុរស ៤៩នាក់ ដោយជនរងគ្រោះក្មេងជាងគេ គឺជាទារកអាយុ ១ខួប និងចាស់ជាងគេវ័យ ៩៧ឆ្នាំ។

អ្នកធ្វើការតាមផ្ទះជាជនបរទេស មកពីប្រទេសឥណ្ឌូនេស៊ី និងហ្វីលីពីន ស្ថិតក្នុងចំណោមមនុស្ស ៣១នាក់ ដែលនៅតែបាត់ខ្លួន។

នគរបានចាប់ខ្លួនជនសង្ស័យចំនួន ២១នាក់ ជុំវិញបទសង្ស័យឃាតកម្ម នៅក្នុងការស៊ើបអង្កេតស្វែងរកមូលហេតុដែលនាំឲ្យមានអគ្គិភ័យនេះ ខណៈដែលស្ថាប័នប្រឆាំងអំពើពុករលួយរបស់ទីក្រុងហុងកុង ក៏កំពុងស៊ើបអង្កេតករណីពុករលួយផងដែរ៕