អង្គការឧតុនិយមពិភពលោក(WMO)នៃអង្គការសហប្រជាជាតិ(UN) និយាយថា ភ្លៀងធ្លាក់ខ្លាំងបង្កឡើងដោយសារព្យុះស៊ីក្លូនត្រូពិកកម្រដែលបានវាយប្រហារតំបន់ជាច្រើននៅតំបន់អាស៊ី-អាគ្នេយ៍ និងអាស៊ីខាងត្បូង កាលពីសប្តាហ៍មុន នឹងកាន់តែកើតមានញឹកញាប់នៅក្នុងពិភពលោកដែលកំពុងឡើងកំដៅ ។

 លោក Clare Nullis គឺជាអ្នកនាំពាក្យអង្គការ WMO និយាយប្រាប់ក្រុមអ្នកសារព័ត៌មាននៅក្នុងទីក្រុងហ្សឺណែវ ប្រទេសស្វីស កាលពីថ្ងៃអង្គារថា សីតុណ្ហភាពកើនឡើង បង្កើនហានិភ័យដ៏មានសក្តានុពលនៃភ្លៀងធ្លាក់កាន់តែខ្លាំង ដោយសារបរិយាកាសឡើងក្តៅជាងមុន មានសំណើមច្រើន ។ នោះគឺជាច្បាប់រូបវិទ្យា ដូច្នេះហើយ ពួកយើងនឹងមើលឃើញមានភ្លៀងធ្លាក់កាន់តែខ្លាំង ហើយពួកយើងនឹងបន្តមើលឃើញបែបនេះ នៅពេលអនាគត ។

 លោក Nullis និយាយផងដែរថា ព្យុះស៊ីក្លូនត្រូពិកកាន់តែជិតខ្សែអេក្វាទ័រ គឺជារឿងកម្រ ហេតុដូច្នេះហើយ សហគមន៍នៅតំបន់នោះ ត្រៀមខ្លួនមិនបានច្រើនឡើយ ក្នុងការទប់ទល់នឹងគ្រោះមហន្តរាយធម្មជាតិ ធ្វើឲ្យផលប៉ះពាល់កាន់តែខ្លាំង ។

 លោកនិយាយថា ស្ថានីយឧតុនិយមមួយកន្លែងនៅប្រទេសវៀតណាម មើលឃើញភ្លៀងធ្លាក់កម្ពស់ខ្ពស់បំផុតទី ២ពុំធ្លាប់រកឃើញកាលពីមុនមក ។

សូមបញ្ជាក់ថា ប្រទេសឥណ្ឌូនេស៊ី ម៉ាឡេស៊ី ថៃ និងស្រីលង្កា រងការវាយប្រហារដោយសារភ្លៀងធ្លាក់ខ្លាំង និងខ្យល់បក់ខ្លាំង កាលពីសប្តាហ៍មុន ដែលធ្វើឲ្យរារាំងដល់កិច្ចខិតខំក្នុងការធ្វើដំណើរទៅដល់មនុស្សជាប់ខ្លួនក្នុងបំណាក់ដី និងទឹកជំនន់ធ្ងន់ធ្ងរ ៕