ប្រធានាធិបតីអាមេរិក លោក Donald Trump បាននិយាយនៅថ្ងៃពុធ (៣ ធ្នូ) ថា ផ្លូវឆ្ពោះទៅមុខសម្រាប់កិច្ចចរចាសន្តិភាពអ៊ុយក្រែន មានភាពមិនច្បាស់លាស់ទេ ទោះបីលោកហៅកិច្ចចរចារវាងប្រធានាធិបតីរុស្ស៊ី Vladimir Putin និងប្រេសិតអាមេរិក នៅទីក្រុងមូស្គូថា "ល្អគួរសម" ក៏ដោយ។

វិមានក្រឹមឡាំង បាននិយាយថា លោក Putin ទទួលយកចំណុចមួយចំនួននៃសំណើរបស់អាមេរិក ដែលមានបំណងបញ្ចប់សង្រ្គាមនៅអ៊ុយក្រែន ហើយត្រៀមខ្លួនបន្តធ្វើការដើម្បីស្វែងរកការសម្របសម្រួល។ ប្រេសិតពិសេសអាមេរិក លោក Steve Witkoff និងលោក Jared Kushner ដែលជាទីប្រឹក្សាហើយក៏ជាជាកូនប្រសាររបស់លោក Trump បានចំណាយពេលជាច្រើនម៉ោងនៅវិមានក្រឹមឡាំង និងចាកចេញនៅព្រឹកព្រលឹមថ្ងៃពុធ ដោយពុំមានវឌ្ឃនភាពជាក់លាក់ណាមួយស្តីពីការបញ្ចប់សង្រ្គាមនោះទេ។

ថ្លែងនៅការិយាល័យ Oval Office លោក Trump បាននិយាយថា លោក Witkoff និងលោក Kushner បានសង្ខេបប្រាប់លោកអំពីកិច្ចពិភាក្សាទីក្រុងមូស្គូ ហើយថា "លោក Putin ចង់ធ្វើកិច្ចព្រមព្រៀងមួយ"។ យ៉ាងណាមិញ លោក Trump បន្ថែមថា អ្វីដែលកើតឡើងពេលនេះ គឺមិនច្បាស់លាស់ទេ ប៉ុន្តែកំពុងមានអ្វីមួយដែល “ដំណើរការល្អគួរសម” លើរឿងអ៊ុយក្រែន។

នៅខាងរុស្ស៊ីវិញ ពេលត្រូវសាកសួរថា តើលោក Putin បានច្រានចោលសំណើរបស់អាមេរិកមែនទេ អ្នកនាំពាក្យវិមានក្រឹមឡាំង លោក Dmitry Peskov ឆ្លើយថា "មិនមែនទេ" ដោយនិយាយថា "រឿងខ្លះត្រូវបានទទួលយក រឿងខ្លះត្រូវសម្គាល់ថាមិនអាចទទួលយកបាន ហើយនេះជាដំណើរការធម្មតាប៉ុណ្ណោះនៃការស្វែងរកចំណុចសម្របសម្រួលមួយ"។ មន្រ្តីវិមានក្រឹមឡាំងម្នាក់ បាននិយាយបន្ទាប់ពីកិច្ចប្រជុំនេះថា "ចំណុចសម្របសម្រួលនោះ រកមិនទាន់ឃើញនៅឡើយទេ"៕