ភ្នំពេញ៖ អត្រាជនមានពិការភាពនៅក្នុងប្រទេសកម្ពុជា បានកើនឡើងដល់ជាង ១លាន ៦​សែន​នាក់​ ស្មើនឹង ៥,៥ភាគរយ នៃប្រជាពលរដ្ឋខ្មែរសរុបជាង ១៧លាននាក់ ខណៈ​បញ្ហា​គ្រោះ​ថ្នាក់​ចរាចរណ៍​ ក៏ជាដើមចមមួយ ធ្វើឲ្យមានកំណើនដែលគួរឲ្យព្រួយបារម្ភនេះ។

ក្នុង​ទិវាជនមានពិការភាពកម្ពុជា លើកទី២៧ និងអន្តរជាតិលើកទី៤៣ ក្រោមប្រធានបទ “បរិយា​បន្ន​ពិការ​ភាព​លើ​គ្រប់វិស័យ ដើម្បីលើកកម្ពស់វឌ្ឍនភាពសង្គម” កាលពីថ្ងៃទី៣ ខែធ្នូ ឆ្នាំ២០២៥ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា មាន​ប្រសាស​ន៍​ថា​ អត្រានៃចំនួនជនមានពិការភាពទាំងជាង ១លាន ៦សែននាក់នេះ ធ្វើឡើង​តាម​រយៈកា​រ​ជំរឿន​ប្រជាជន​កម្ពុជា​ កាលពីឆ្នាំ២០២៤ ដែលចំនួននេះ មានការកើនឡើងច្រើន បើធៀបទៅនឹង​ការ​ជំរឿន​កាលពីឆ្នាំ២០១៣ ដែលមានត្រឹមជាង ៣០ម៉ឺននាក់ប៉ុណ្ណោះ។

ឯកឧត្តមបានបន្តថា មូលហេតុចម្បងៗ ដែលនាំឲ្យមានពិការភាព គឺបណ្ដាលមកពីជំងឺឆ្លង ជំងឺ​មិន​ឆ្លង​ តំណពូជ គ្រោះថ្នាក់ចរាចរណ៍ គ្រោះថ្នាក់ការងារ គ្រោះថ្នាក់ដោយសារគ្រាប់មីន និង​យុទ្ធភ័ណ្ឌ​​មិន​ទាន់ផ្ទុះ អំពើហិង្សា គ្រោះមហន្តរាយ ចាស់ជរា ជំងឺរ៉ាំរ៉ៃ បម្រែបម្រួលអាកាសធាតុ ការប្រើប្រាស់ឧបករណ៍បច្ចេកវិទ្យាមិនបានត្រឹមត្រូវ និងមូលហេតុផ្សេងៗទៀត ។

ឯកឧត្តមរដ្ឋមន្ត្រី គូសបញ្ជាក់ថា ទាំងនេះ ជាកង្វល់ដែលរាជរដ្ឋាភិបាលត្រូវគិតគូរ ដោះស្រាយ ដើម្បី​ធានាដល់ការរស់នៅប្រកបដោយសមធម៌ សេចក្តីថ្លៃថ្នូរ និងបរិយាបន្ន សម្រាប់​ជន​មាន​ពិការ​ភាព​ ស្របតាមការរីកចម្រើនរបស់សង្គមជាតិ និងគោលការណ៍គ្រឹះនៃអន្តរជាតិ “មិន​បោះ​បង់​ពលរដ្ឋ​ណា​ម្នាក់” ដែលរាជរដ្ឋាភិបាលកម្ពុជាបានប្រកាន់យក ។

ឯកឧត្តម ជា សុមេធី បានបន្ថែមថា ទន្ទឹមនឹងការកើនឡើន នៃជនមានពិការភាពនេះ រាជ​រដ្ឋាភិបាល​កម្ពុជា បានផ្ដល់សេវាលទ្ធភាពពលកម្មគ្រប់ប្រភេទ ជូនជនមានពិការភាពចំនួនជាង ៧ម៉ឺន ៧ពាន់នាក់, ស្ដារលទ្ធភាពពលកម្មវេជ្ជសាស្ត្រជាង ៣ម៉ឺននាក់ ព្រមទាំងសាងសង់ ផ្ទះ​ជូន​ជន​មាន​ពិការភាពក្រីក្រនៅតាមសហគមន៍បានចំនួន ១២ខ្នង ។

គួរបញ្ជាក់ថា បច្ចុប្បន្ននេះ មានក្រសួងស្ថាប័នរដ្ឋចំនួន៤០ បានទទួល​យក​ជន​មាន​ពិការ​ភាពចូ​ល​បម្រើ​ការងារសរុបជាង ៧ពាន់នាក់ ស្មើនឹង ២.៤៨ភាគរយ ខណៈទាំងក្រសួង ស្ថាប័ន រដ្ឋ និ​ង​ផ្នែក​ឯក​ជន បានទទួលយកជនមានពិការភាព ចួលបម្រើការងារសរុបចំនួន ១៤ ៤០៧នាក់ ។ ជា​មួយគ្នានេះ សិស្សមានពិការភាពគ្រប់ភូមិសិក្សា និងគ្រប់ប្រភេទពិការភាពចំនួនជាង ៣​ម៉ឺន​នាក់​ បានទទួលសេវាអប់រំបរិយាបន្ន នៅក្នុងវិទ្យាល័យអប់រំពិសេសផងដែរ៕ អត្ថបទ៖ បាន សុខរិទ្ធិ