កិច្ចប្រជុំរវាងលោកប្រធានាធិបតី Zelenskyy និងគណៈប្រតិភូអាមេរិកត្រូវបានលុបចោល បន្ទាប់ពីការចរចាក្នុងប្រទេសរុស្ស៊ីស្តីពីសង្គ្រាមនៅអ៊ុយក្រែនបានបញ្ចប់ដោយគ្មានការទម្លាយភាពទាល់ច្រក។

លោក Steve Witkoff បេសកជនពិសេសរបស់លោកប្រធានាធិបតី Trump និងកូនប្រសាររបស់លោកគឺលោក Jared Kushner បាននិយាយជាមួយប្រធានាធិបតី Putin និងមន្ត្រីរុស្ស៊ីផ្សេងទៀតនៅទីក្រុងមូស្គូរយៈពេលប្រាំម៉ោងកាលពីថ្ងៃអង្គារសប្ដាហ៍នេះ ប៉ុន្តែពុំបានធ្វើឱ្យមានវឌ្ឍនភាពណាមួយលើកិច្ចព្រមព្រៀងសន្តិភាពនោះទេ។     

អគ្គលេខាធិការណាតូ លោក Mark Rutte បានព្រមានលោក Putin កាលពីថ្ងៃពុធថាសម្ព័ន្ធយោធានេះ ត្រៀមខ្លួនរួចរាល់ក្នុងការការពារខ្លូន និងមានឆន្ទៈប្រឆាំងនឹងទីក្រុងមូស្គូ ប្រសិនបើខ្លួនរងការវាយប្រហារ ខណៈលោកព្រមានដែរថា សម្ព័ន្ធនេះបានប្រឈមនឹងគ្រោះថ្នាក់ដ៏ពិប្រាកដនិងយូរអង្វែង។   

ក្រុមអ្នកចរចាអាមេរិកត្រូវបានគ្រោងជួបលោក Zelenskyy នៅទីក្រុងព្រុចសែលនៅថ្ងៃបន្ទាប់។ ទោះជាយ៉ាងណាក៏ដោយ លោក Witkoff និងលោក Kushner បានចាកចេញពីទីក្រុងមូស្គូនៅយប់ថ្ងៃអង្គារទៅកាន់ទីក្រុងវ៉ាស៊ីនតោនវិញ នេះបើយោងតាមវិមានក្រឹមឡាំង។ អ្នកឆ្លើយឆ្លងព័ត៌មាន Kyiv Post នៅទីក្រុងវ៉ាស៊ីនតោនបានសរសេរនៅលើបណ្ដាញសង្គម X ដោយសំអាងដល់ប្រភពព័ត៌មាននានាថា កិច្ចប្រជុំនៅទីក្រុងព្រុចសែល ត្រូវបានលុបចោល ដោយបន្ថែមថា លោក Zelenskyy កំពុងវិលត្រឡប់ទៅអ៊ុយក្រែនវិញ។

មិនមានការពន្យល់ណាមួយត្រូវបានផ្តល់ឱ្យទេ ប៉ុន្តែការលុបចោលភ្លាមៗទំនងជាឆ្លុះបញ្ចាំងពីកង្វះវឌ្ឍនភាពណាមួយលើការបញ្ចប់សង្គ្រាម ដែលនឹងឈានចូលដល់ខួបបួនឆ្នាំនៃសង្គ្រាមដែលបានផ្ទុះឡើងកាលពីថ្ងៃទី២៤កុម្ភៈ២០២២។ កិច្ចចរចានៅទីក្រុងមូស្គូបានកើតឡើងបន្ទាប់ពីលោក Putin បានចោទប្រកាន់បណ្ដាប្រទេសនៅអឺរ៉ុបថាបានព្យាយាមបំផ្លាញការចរចាសន្តិភាព និងព្រមានធ្វើសង្គ្រាមជាមួយអឺរ៉ុបបើប្លុកនេះចាប់ផ្ដើមមុន។ វិមានក្រឹមឡាំងបានទទូចថារបាយការណ៍ដែលថាលោកPutin បដិសេធសំណើអាមេរិកនៅថ្ងៃទី ២ ខែធ្នូ គឺមិនត្រឹមត្រូវទេ។ លោក Dmitry Peskov អ្នកនាំពាក្យវិមានក្រឹមឡាំងបាននិយាយថាវាជារឿងខុសក្នុងការអះអាងថាទីក្រុងមូស្គូបានបដិសេធផែនការនេះក្នុងអំឡុងពេលកិច្ចប្រជុំរយៈពេល៥ម៉ោងជាមួយបេសកជនពិសេសអាមេរិក លោក Steve Witkoff និងលោក Jared Kushner៕