​បាល់ទាត់៖ ក្រុមបាល់ទាត់​ជម្រើស​ជាតិ​អាយុ​ក្រោម ២៣​ឆ្នាំ​កម្ពុជា​បាន​ខកខាន​ឱកាស​ឡើង​វគ្គ​ពាក់កណ្ដាល​ផ្ដាច់ព្រ័ត្រ​នៃ​ពានរង្វាន់​ AFF U23 Championship 2022 ​ហើយក្រោយ​ក្រុម​ U23 ​វៀតណាម​បាន​យកឈ្នះ​ក្រុម​ U23 ​ថៃ​ត្រឹម​លទ្ធផល ១-០ ក្នុង​ជំនួប​បញ្ចប់​ពូ​ល​ C ​នៅ​ពហុ​កីឡដ្ឋាន​ព្រី​នស៍កាលពី​យប់​ថ្ងៃ​ទី​២២ ខែ​កុម្ភៈ ឆ្នាំ​២០២២​។​

១​គ្រាប់​ដែល​ជួយ​ឲ្យ​ក្រុម​ U23 ​វៀតណាមបន្ដ​ឈរ​កំពូល​តារាង​ពូ​ល​ C ​ធ្វើ​សម្រេច​ដោយ​កីឡាករ​ Nguyen Trung Thanh ​នៅ​នាទី​២៩។ ចំពោះ​ក្រុម​ថៃក៏បាន​ព្យាយាម​វាយ​សម្រុក​ណាស់ដែរ តែ​មិនអាច​បំប៉ោង​សំណាញ់​ទី​វៀតណាម​បានឡើយ។ យ៉ាងណាមិញលទ្ធផល​នេះ បានធ្វើ​ឲ្យ​ក្រុម​ទាំងពីរដឹក​ដៃ​គ្នា​ឡើង​វគ្គ​ពាក់កណ្ដាល​ផ្ដាច់ព្រ័ត្រ​ដូចគ្នា។​ ​ប៉ុន្ដែ​អ្វីដែល​គួរ​ឲ្យ​សោកស្ដាយ​សម្រាប់​ម្ចាស់ផ្ទះ​កម្ពុជា គឺ​លទ្ធផល​នេះបានធ្វើ​ឲ្យ​ក្រុម​គោព្រៃ​ជំទង់​កម្ពុជាបាត់បង់​ឱកាស​ឡើង​វគ្គ​បន្ដ​តែម្ដង បន្ទាប់ពី​ប្រៀបធៀប​ក្រុម​លេខ​២ ល្អ​ជាងគេរវាង​ពូ​ល​ A ​និង​ពូ​ល​ C ​ដោយ​កម្ពុជាចាញ់​ប្រៀប​ថៃត្រង់​គ្រាប់​បាល់​ចំណេញ ១​គ្រាប់​គត់ ពោលគឺ​ក្រុម​ទាំងពីរ​មាន ៣​ពិន្ទុ​ស្មើគ្នា តែ​ថៃនៅសល់​គ្រាប់​បាល់​ចំណេញ​ក្នុង​ដៃ ១​គ្រាប់ ខណៈ​កម្ពុជាមិនមាន​គ្រាប់​ចំណេញ​ឡើយ។​

​សម្រាប់​បេក្ខភាព​វគ្គ​ពាក់កណ្ដាល​ផ្ដាច់ព្រ័ត្រ និង​កម្មវិធី​ប្រកួតដែល​គ្រោង​ធ្វើឡើង​នៅ​ពហុ​កីឡដ្ឋាន​ជាតិ​មរតក​តេ​ជោនា​ថ្ងៃទី​២៤ ខែកុម្ភៈ​ស្អែក​នេះ រួមមាន​ក្រុម​លេខ​១ ពូ​ល​ A ​ទី​ម័​រ​ខាងកើតត្រូវ​ជួប​ក្រុម​កំពូល​តារាង​ពូ​ល​ C ​វៀតណាម ខណៈ​ក្រុម​លេខ​២ ពូ​ល​ C ​ថៃត្រូវ​ជួប​ក្រុម​កំពូល​តារាង​ពូ​ល​ B ​ឡាវ។ ចំពោះ​ក្រុម​ទទួលបាន​ជ័យជម្នះនឹងត្រូវ​ឡើង​វគ្គ​ផ្ដាច់ព្រ័ត្រ ដែល​នឹងត្រូវ​ប្រកួត​កាត់សេចក្ដី​រក​ជើងឯកនា​ថ្ងៃទី​២៦ ខែកុម្ភៈ​ខាងមុខ៕

​អត្ថបទ៖ លី ឈុន​ឡា