វិមានក្រឹមឡាំងបាននិយាយកាលពីថ្ងៃពុធ ទី៣ ខែធ្នូ ថា ការរំពឹងទុកនៃការចូលជាសមាជិកសម្ព័ន្ធយោធាNATO របស់អ៊ុយក្រែន គឺជា «បញ្ហាសំខាន់» ក្នុងកិច្ចពិភាក្សារវាងសហរដ្ឋអាមេរិក និងរុស្ស៊ី នៅទីក្រុងមូស្គូ បន្ទាប់ពីការចរចាជាមួយបេសកជនសហរដ្ឋអាមេរិកពុំបាននាំមកនូវសញ្ញានៃការទម្លាយភាពទាល់ច្រកណាមួយឡើយ។

សមាជិកភាពនៅក្នុងសម្ព័ន្ធនេះ គឺជាឧបសគ្គមួយក្នុងកិច្ចខិតខំប្រឹងប្រែងដឹកនាំដោយសហរដ្ឋអាមេរិក ដើម្បីបញ្ចប់សង្គ្រាមរយៈពេល៤ឆ្នាំ ជាជម្លោះដែលប្រធានាធិបតីសហរដ្ឋអាមេរិក លោក Donald Trump បានសន្យាថាដោះស្រាយនៅក្នុងថ្ងៃនៃការវិលត្រឡប់ចូលទៅកាន់តំណែងវិញ។ ទីក្រុងគីវ ចាត់ទុកសមាជិកភាពនៅក្នុងសម្ព័ន្ធយោធាNATO ជារបាំងការពារប្រឆាំងការវាយប្រហាររបស់រុស្ស៊ី នាពេលអនាគត ខណៈប្រធានាធិបតីរុស្ស៊ី លោក Vladimir Putin បានលើកឡើងពីការពង្រីកខ្លួនរបស់សម្ព័ន្ធយោធា NATO ជាហេតុផលមួយសម្រាប់ការបញ្ជូនកងទ័ពទៅកាន់ប្រទេសអ៊ុយក្រែន។

ប្រធានបទនេះគឺជា «បញ្ហាដ៏សំខាន់ វាត្រូវតែបានពិភាក្សា» រវាង លោកPutin បេសកជនសហរដ្ឋអាមេរិក លោកSteve Witkoff និងកូនប្រសាររបស់លោកTrump គឺលោកJared Kushner និងជំនួយការជាន់ខ្ពស់របស់វិមានក្រឹមឡាំងលោក Yuri Ushakov។ លោក Ushakov បានប្រាប់អ្នកសារព័ត៌មាន ក្នុងអំឡុងពេលសន្និសីទសារព័ត៌មានថា «ដៃគូអាមេរិក បានបញ្ជាក់ពីការត្រៀមក្នុងការលើកយកមកពិចារណា និងសំណើសំខាន់ៗរបស់យើង»។ លោក Trump បានច្រានចោលដដែលៗចំពោះសមាជិកភាពសម្ព័ន្ធយោធាNATO របស់អ៊ុយក្រែន ហើយផែនការ២៨ចំណុចចុងក្រោយរបស់លោក ដែលអ្នករិះគន់បាននិយាយថាជាបញ្ជីបំណងប្រាថ្នារបស់រុស្ស៊ី ដែលបានបញ្ជាក់យ៉ាងច្បាស់ថា ទីក្រុងគីវនឹងមិនដែលត្រូវបានអនុញ្ញាតឱ្យចូលរួមក្នុងសម្ព័ន្ធនេះឡើយ។ ប្រមុខ NATO លោក Mark Rutte បាននិយាយថា ទ្វារនៅតែបើកចំហសម្រាប់សមាជិកភាពរបស់ទីក្រុងគីវ ប៉ុន្តែបាននិយាយបន្ថែមថា បច្ចុប្បន្ន «ពុំមានការឯកភាពគ្នាលើការចូលជាសមាជិកសម្ព័ន្ធយោធាNATO របស់អ៊ុយក្រែនឡើយ»។