ប្រធានាធិបតីចិន លោក Xi Jinping បានជួបលោកប្រធានាធិបតីបារាំង Emmanuel Macron ក្នុងទីក្រុងប៉េកាំង នៅថ្ងៃព្រហស្បតិ៍ (៤ ធ្នូ) នេះ នៅក្នុងដំណើរទស្សនកិច្ចផ្លូវរដ្ឋលើកទី៤ ហើយរបស់មេដឹកនាំបារាំងរូបនេះទៅកាន់រដ្ឋធានីចិន ខណៈអឺរ៉ុប ស្វះស្វែងរកតុល្យភាពឡើងវិញផ្នែកសេដ្ឋកិច្ច និងសន្តិសុខពីមហាអំណាចសេដ្ឋកិច្ចធំទីពីររបស់ពិភពលោក។

លោក Macron ដែលបានចាប់ផ្តើមទស្សនកិច្ចនៅទីក្រុងប៉េកាំងកាលពីថ្ងៃពុធ នឹងជួបជាមួយលោក Xi ម្តងទៀត អំឡុងពេលធ្វើដំណើរទៅកាន់ទីក្រុងឆឹងទូ ក្នុងខេត្តស៊ីឈួន ភាគនិរតីនៅថ្ងៃសុក្រស្អែកនេះ។

ភាពតានតឹងពាណិជ្ជកម្មរវាងចិន និងសហភាពអឺរ៉ុប ដែលមានពាណិជ្ជកម្មទ្វេភាគីមានប្រហែល ៧៨៥,៨ពាន់លានដុល្លារ ក្នុងឆ្នាំ២០២៤ ទំនងជានឹងគ្របដណ្តប់លើកិច្ចពិភាក្សារវាងមេដឹកនាំទាំងពីរ។ ក្រុមអ្នកសង្កេតការណ៍នយោបាយ បានប្រាប់សារព័ត៌មានទួរគី Anadolu ថា ទោះជាដំណើររបស់ Macron គឺ "មានសារៈសំខាន់ជានិមិត្តរូប" ក៏ដោយ ក៏ទស្សនកិច្ចនេះបានបង្ហាញច្បាស់ថា អឺរ៉ុប "ចង់រក្សាកិច្ចសន្ទនានិងជៀសវាងការអូសចូលទៅក្នុងយុទ្ធសាស្ត្រទប់ស្កាត់របស់ទីក្រុងវ៉ាស៊ីនតោន"។

កាលពីថ្ងៃពុធ នៅមុនពេលថ្នាក់ដឹកនាំទាំងពីរបានជួបគ្នា ប្រមុខការទូតទីក្រុងប៉េកាំង និងសមភាគីទីក្រុងប៉ារីស ក៏បានបើកកិច្ចពិភាក្សាដាច់ដោយឡែកមួយផងដែរ។ នៅក្នុងជំនួបនោះ រដ្ឋមន្ត្រីការបរទេសចិន លោក Wang Yi បាននិយាយថា លោកសង្ឃឹមនិងជឿជាក់ថា បារាំង នឹងបន្តយល់ច្បាស់ និងគាំទ្រគោលការណ៍ចិនតែមួយ៕