ស៊ីហ្គេម៖ កីឡាករ-កីឡាការិនីជម្រើសជាតិ គ្រូបង្វឹក និងមន្ត្រីកីឡាពាក់ព័ន្ធប្រមាណជាង ២០០នាក់ ពិសេសគឺក្រុមបាល់ទាត់ជម្រើសជាតិកម្ពុជា បានទទួលការចាក់វ៉ាក់សាំងបង្ការជំងឺកូវីដ-១៩ ដើម្បីបង្គ្រប់ចំនួន ១,០៥១នាក់តាមការអនុញ្ញាតរបស់សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នៃយុទ្ធនាការចាក់វ៉ាក់សាំងដល់ថ្នាក់ដឹកនាំ មន្ដ្រីកីឡា គ្រូបង្វឹក និងកីឡាករ-កីឡាការិនីជម្រើសជាតិកម្ពុជាលើកទី១ រួចហើយនៅថ្ងៃទី១៥ ខែមីនា ឆ្នាំ២០២១។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានមានប្រសាសន៍ថា ថ្ងៃនេះដោយទទួលបានការអនុញ្ញាតដ៏ខ្ពង់ខ្ពស់ពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន CAMSOC ការផ្ដល់វ៉ាក់សាំងដល់កីឡាករ-កីឡាការិនី គ្រូបង្វឹក និងមន្ត្រីកីឡាពាក់ព័ន្ធទាំងអស់ ដែលត្រៀមលក្ខណៈចេញទៅក្រៅប្រទេសក្នុងឆ្នាំ២០២១ ដែលគ្រោងចាក់ ៣ ទៅ ៤ថ្ងៃគឺបានបញ្ចប់ហើយដើម្បីបង្គ្រប់ចំនួន ១,០០៥១នាក់។
យ៉ាងណាមិញស្របជាមួយកាលៈទេសៈ នៃការរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ឯកឧត្ដមរដ្ឋលេខាធិការក្រសួងទេសចរណ៍ដដែល បានបន្ដធ្វើការអំពាវនាវយ៉ាងទទូចឲ្យគោរព តាមសេចក្ដីណែនាំរបស់រាជរដ្ឋាភិបាល និងក្រសួងសុខាភិបាល ពិសេសវិធានការ ៣ការពារ និង ៣កុំ ទោះបីទទួលបានវ៉ាក់សាំងដូសទី១ ក៏ដោយដើម្បីបង្ការជំងឺដ៏កាចសាហាវនេះ។ លើសពីនេះ កីឡាករ-កីឡាការិនីទាំងអស់ត្រូវសម្រាកសកម្មភាព ដោយព្យាយាមហ្វឹកហាត់ខ្លួនឯងឲ្យបានទៀងទាត់នៅតាមផ្ទះ ឬទីកន្លែងមានសុវត្ថិភាពរៀងៗខ្លួនដើម្បីរក្សាទម្ងន់ និងកម្លាំងពេលត្រឡប់មកប្រមូលផ្ដុំហ្វឹកហាត់ជុំគ្នាវិញ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
