​សហរដ្ឋអាមេរិក៖ អ្នកនាំពាក្យ​សេត​វិមានលោកស្រី Jen Psaki បាន​ប្រាប់​ក្រុម​អ្នកយកព័ត៌មាន​កាលពី​ថ្ងៃ​អង្គា​រថា រាល់​ផែនការ​សម្រាប់​កិច្ចប្រជុំ​រវាង​លោក​ប្រធានាធិបតី Biden និង​លោក​ប្រធានាធិបតី​រុស្ស៊ី​ Vladimir Putin ត្រូវបាន​ផ្អាក​។ ​លោកស្រី Psaki មិនបាន​ច្រាន​ចោល​ការប្រជុំ​ដែល​កើតឡើង​នៅពេល​អនាគត​នោះទេ ប៉ុន្តែ​បាន​និយាយថា លោក Biden នឹងមិន​ជួប​ជាមួយ​លោក Putin លុះត្រាតែ​រុស្ស៊ី​បន្ធូរបន្ថយ​ស្ថានការណ៍​ក្នុងប្រទេស​អ៊ុយ​ក្រែ​ន​ដោយ​ការដក​កងទ័ព​។​

​លោកស្រី​បាន​ប្រាប់​អ្នកយកព័ត៌មាន​ក្នុងអំឡុង​សន្និសីទ​សារព័ត៌មាន​ខ្លី​មួយ​ថា យើង​នឹងមិន​បិទទ្វារ​ទាំងស្រុង​ចំពោះ​ផ្នែក​ការទូត​នោះទេ​ ប៉ុន្តែ​ទោះយ៉ាងណាលោកស្រី​បាន​បន្ថែមថា ការទូត​មិនអាច​ជោគជ័យ​បានទេ លុះត្រាតែ​រុស្ស៊ី​ផ្លាស់ប្តូរ​ជំហរ​។​ ​ការអត្ថាធិប្បាយ​នេះ​ពុំមាន​ការភ្ញាក់ផ្អើល​ខ្លាំង​ណាស់ណា​ទេ​។ ប៉ុន្មាន​នាទី​មុន ប្រមុខ​ការទូតអាមេរិកលោក Antony Blinken បាន​និយាយថា លោក​កំពុង​លុបចោលកិច្ចប្រជុំ​ជាមួយ​រដ្ឋមន្ត្រីការបរទេស​រុស្ស៊ីលោក Sergey Lavrov ដែល​បានគ្រោង​ទុកជា​បណ្តោះអាសន្ន​សម្រាប់​ថ្ងៃ​ព្រហស្បតិ៍​ស្អែក​នេះ​៕

អត្ថបទ៖ សុខមាន