រដ្ឋបាលរបស់លោកប្រធានាធិបតីអាមេរិក Donald Trump កាលពីថ្ងៃពុធ (៣ ធ្នូ) បានប្រកាសបង្កើនការត្រួតពិនិត្យកាន់តែតឹងរ៉ឹង លើអ្នកដាក់ពាក្យស្នើសុំទិដ្ឋាការប្រភេទ H-1B សម្រាប់បុគ្គលិកមានជំនាញខ្ពស់ ដោយអនុស្សរណៈផ្ទៃក្នុងរបស់ក្រសួងការបរទេស បាននិយាយថា នរណាម្នាក់ដែលពាក់ព័ន្ធនឹង "ការឃ្លាំមើល" នៃសេរីភាពបញ្ចេញមតិ អាចនឹងត្រូវបដិសេធទិដ្ឋាការ។

គួរឱ្យដឹងថា ទិដ្ឋាការ H-1B នេះ អនុញ្ញាតឱ្យនិយោជកអាមេរិក ជួលបុគ្គលិកបរទេសក្នុងជំនាញឯកទេស ហើយមានសារៈសំខាន់ណាស់សម្រាប់ក្រុមហ៊ុនបច្ចេកវិទ្យាអាមេរិក ដែលបានជួលបុគ្គលិកយ៉ាងច្រើនពីជុំវិញពិភពលោក រួមទាំងឥណ្ឌា និងចិន។ ក្រុមហ៊ុនអាមេរិកជាច្រើនក្នុងចំណោមនោះ បានដាក់ការគាំទ្ររបស់ពួកគេនៅពីក្រោយលោក Trump ក្នុងការបោះឆ្នោតប្រធានាធិបតីឆ្នាំមុន។

អនុស្សរណៈផ្ទៃក្នុង ដែលបានផ្ញើទៅកាន់បេសកកម្មការទូតទាំងអស់របស់អាមេរិក នៅថ្ងៃទី២ ខែធ្នូ កន្លងទៅ បានបញ្ជាឱ្យមន្ត្រីកុងស៊ុលអាមេរិក ត្រួតពិនិត្យឡើងវិញនូវប្រវត្តិរូបសង្ខេប ឬប្រវត្តិរូបក្នុងកម្មវិធីការងារ LinkedIn របស់អ្នកដាក់ពាក្យស្នើសុំទិដ្ឋាការ H-1B រួមទាំងសមាជិកគ្រួសារ ដែលនឹងធ្វើដំណើរជាមួយពួកគេ ដើម្បីមើលថា តើពួកគេបានធ្វើការក្នុងវិស័យណាដែលរួមមានសកម្មភាពដូចជា ព័ត៌មានមិនពិត ប្រឌិតព័ត៌មានក្លែងក្លាយដោយចេតនា ការសម្របសម្រួលខ្លឹមសារ ការត្រួតពិនិត្យការពិត ការអនុលោមតាមច្បាប់ និងសុវត្ថិភាពតាមអ៊ីនធឺណិតជាដើម។

សេចក្ដីរាយការណ៍និយាយថា ចំណុចលម្អិតពីការត្រួតពិនិត្យទិដ្ឋាការ H-1B ឱ្យកាន់តែប្រសើរឡើងនេះ ផ្តោតសំខាន់លើការឃ្លាំមើលតាមអ៊ីនធឺណិត និងសេរីភាពបញ្ចេញមតិ។ អនុស្សរណៈផ្ទៃក្នុងនិយាយថា អ្នកដាក់ពាក្យស្នើទិដ្ឋាការទាំងអស់ ត្រូវស្ថិតក្រោមគោលនយោបាយនេះ ប៉ុន្តែក៏ចង់ពិនិត្យឡើងវិញកាន់តែតឹងរ៉ឹងថែមទៀត សម្រាប់អ្នកដាក់ពាក្យស្នើ H-1B ដោយសារពួកគេតែងតែធ្វើការក្នុងវិស័យបច្ចេកវិទ្យា "រួមទាំងក្នុងប្រព័ន្ធផ្សព្វផ្សាយសង្គម ឬក្រុមហ៊ុនសេវាហិរញ្ញវត្ថុ ដែលពាក់ព័ន្ធនឹងការបង្ក្រាបលើការបញ្ចេញមតិដោយសេរី ដែលទទួលបានការការពារនៅអាមេរិក"៕