ការប៉ះទង្គិចគ្នារវាងនិស្សិត និងកងកម្លាំងសន្តិសុខនៅសាកលវិទ្យាល័យធំមួយនៅប្រទេសសេណេហ្គាល់បានកើនឡើងយ៉ាងខ្លាំងកាលពីថ្ងៃពុធ ទី៣ ខែធ្នូ ខណៈក្រុមតវ៉ាបានទាមទារប្រាក់ឧបត្ថម្ភអាហារូបករណ៍ និងជំនួយហិរញ្ញវត្ថុផ្សេងទៀត ក្នុងពេលមានបញ្ហាប្រឈមផ្នែកសារពើពន្ធត្ថុដែលកំពុងបន្តរបស់រដ្ឋាភិបាល។

អាជ្ញាធរនៅសាកលវិទ្យាល័យ Cheikh Anta Diop នៅកណ្តាលរដ្ឋធានីបានស្នើសុំជំនួយពីអាជ្ញាធរអនុវត្តច្បាប់ដើម្បីធានាបានសុវត្ថិភាព ខណៈនិស្សិតដែលគប់ដុំថ្មបានប៉ះទង្គិចជាមួយកងកម្លាំងសន្តិសុខ ដែលឆ្លើយតបដោយឧស្ម័នបង្ហៀរទឹកភ្នែក។

ភាពវឹកវរនេះបានកើតឡើង ខណៈប្រទេសនៅអាហ្វ្រិកខាងលិចមួយកំពុងទប់ទល់ទៅនឹងភាពតានតឹងផ្នែកហិរញ្ញវត្ថុធ្ងន់ធ្ងរ និងបន្ទុកបំណុល ដែលមូលនិធិរូបិយវត្ថុអន្តរជាតិ(IMF)និយាយថាស្មើនឹង ១៣២% នៃផលិតផលក្នុងស្រុកសរុបរបស់ខ្លួន។ នាយករដ្ឋមន្ត្រី លោក Ousmane Sonko ដែលជាអតីតនិស្សិតនៃសាកលវិទ្យាល័យនេះ បានសន្យាថានឹងប្រយុទ្ធប្រឆាំងចំពោះភាពអត់ការងារធ្វើ អំពើពុករលួយ និងភាពផ្តាច់មុខ។

ទោះជាយ៉ាងណា ចាប់តាំងពីលោកចូលកាន់តំណែងកាលពីខែមេសា ឆ្នាំមុន រួមជាមួយប្រធានាធិបតី លោក Bassirou Diomaye Faye រដ្ឋបាលនេះបានប្រឈមទៅនឹងការរិះគន់ពីគណបក្សប្រឆាំងចំពោះការដោះស្រាយបញ្ហាប្រឈមសង្គម និងសេដ្ឋកិច្ចដែលកំពុងកើនឡើង។

ការធ្វើសវនកម្ម ដែលផ្តួចផ្តើមដោយរដ្ឋបាលថ្មីបានបង្ហាញពីបន្ទុកបំណុល និងឱនភាពថវិកា ដែលបានទទួលពីរដ្ឋាភិបាលមុន។