យោធាអ៊ីស្រាអែលបាននិយាយថា ទាហាន ៤នាក់ បានរងរបួសកាលពីថ្ងៃពុធ នៅក្នុងការប៉ះទង្គិចជាមួយក្រុមសកម្មប្រយុទ្ធប៉ាឡេស្ទីន នៅភាគខាងត្បូងហ្កាហ្សា ជាកន្លែងដែលបទឈប់បាញ់ បានបញ្ឈប់ការប្រយុទ្ធគ្នាភាគច្រើនរវាងអ៊ីស្រាអែល និងក្រុមហាម៉ាស។

បទឈប់បាញ់ដែលសម្របសម្រួលដោយសហរដ្ឋអាមេរិកដែលបានចូលជាធរមាន នៅថ្ងៃទី ១០ ខែតុលានៅតែផុយស្រួយ ដោយភាគីទាំងពីរចោទប្រកាន់គ្នាទៅវិញទៅមកថា បានរំលោភលើលក្ខខណ្ឌ។

យោធាអ៊ីស្រាអែលបានអះអាងថា ក្នុងអំឡុងពេលប្រតិបត្តិការមួយនៅក្នុងតំបន់ Rafah ភាគខាងកើតកាលពីថ្ងៃពុធ ទាហានបានជួបប្រទះនឹងជនសកម្មប្រយុទ្ធជាច្រើននាក់ «ដែលបានចេញពីហេដ្ឋារចនាសម្ព័ន្ធភេរវកម្មក្រោមដី»។

យោធាបាននិយាយនៅក្នុងសេចក្តីថ្លែងការណ៍មួយថា៖«ក្នុងអំឡុងពេលប៉ះទង្គិចគ្នា ទាហានប្រយុទ្ធម្នាក់ (អ៊ីស្រាអែល) បានរងរបួសយ៉ាងធ្ងន់ធ្ងរ ទាហានប្រយុទ្ធពីរនាក់ទៀត និងមន្ត្រីម្នាក់ បានរងរបួសមធ្យម»។

យោធាបានបន្ថែមថា ទាហានត្រូវបានបញ្ជូនទៅមន្ទីរពេទ្យ ដើម្បីព្យាបាល ហើយក្រុមគ្រួសាររបស់ពួកគេក៏ត្រូវបានជូនដំណឹងដែរ។

ការិយាល័យរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ បាននិយាយថា លោកនាយករដ្ឋមន្ត្រីអ៊ីស្រាអែល បានជូនពរដល់វីរទាហានរបស់យើង ឲ្យឆាប់ជាសះស្បើយ ដោយចោទប្រកាន់ក្រុមហាម៉ាសថា បានរំលោភលើកិច្ចព្រមព្រៀងបទឈប់បាញ់៕