សហភាពអឺរ៉ុបកាលពីថ្ងៃពុធ បានចេញការណែនាំដែលបានធ្វើបច្ចុប្បន្នភាពសម្រាប់ការដាក់ពាក្យសុំសិទ្ធិជ្រកកោនដោយជនជាតិស៊ីរី ដែលឆ្លុះបញ្ចាំងពីលក្ខខណ្ឌថ្មីនៅក្នុងប្រទេសស៊ីរី មួយឆ្នាំបន្ទាប់ពីការដួលរលំនៃរបបរបស់លោក បាសា អាល់អាសាដ។ ការផ្លាស់ប្តូរទាំងនេះ អាចជះឥទ្ធិពលដល់លទ្ធផលនៃការស្នើ    សុំសិទ្ធិជ្រកកោនរបស់ជនជាតិស៊ីរីប្រហែល ១១០.000នាក់ ដែលបានរង់ចាំការសម្រេចចិត្តសុំសិទ្ធិជ្រកកោន នៅចុងខែកញ្ញា។

ទីភ្នាក់ងារសិទ្ធិជ្រកកោនសហភាពអឺរ៉ុប បាននិយាយថា អ្នកប្រឆាំងនឹងលោក អាសាដ និងអ្នកគេចវេសពីកាតព្វកិច្ចយោធា «លែងប្រឈមនឹងហានិភ័យនៃការធ្វើទុក្ខបុកម្នេញទៀតហើយ»។

ប៉ុន្តែទីភ្នាក់ងារនេះ បានបញ្ជាក់ថា ក្រុមផ្សេងទៀតអាចត្រូវបានចាត់ទុកថា មានហានិភ័យនៅក្នុងប្រទេសស៊ីរី ក្រោយរបបលោក អាសាដ រួមទាំងមនុស្សដែលមានទំនាក់ទំនងជាមួយរដ្ឋាភិបាលចាស់ និងសមាជិកនៃក្រុមជនជាតិភាគតិចអាឡាវិត ( Alawites) អ្នកកាន់គ្រិស្តសាសនា និងជនជាតិភាគតិច Druze។

ខណៈពេលដែលការសម្រេចចិត្តលើការដាក់ពាក្យសុំសិទ្ធិជ្រកកោន ត្រូវបានធ្វើឡើងនៅកម្រិតជាតិ ការណែនាំរបស់ទីភ្នាក់ងារនេះ ត្រូវបានប្រើដើម្បីជូនដំណឹងដល់រដ្ឋសមាជិកសហភាពអឺរ៉ុបចំនួន ២៧ ក៏ដូចជាប្រទេសន័រវែស និងស្វ៊ីស គោលដៅ គឺដើម្បីបង្កើតភាពស៊ីសង្វាក់គ្នាកាន់តែច្រើនរវាងប្រទេសចំនួន ២៩ ដែលផ្តល់ការការពារជាអន្តរជាតិ។

ចំនួនជនជាតិស៊ីរីដែលស្នើសុំសិទ្ធិជ្រកកោន បានធ្លាក់ចុះគួរឲ្យកត់សម្គាល់ពី ១៦.000 នាក់ ក្នុងខែតុលា ឆ្នាំ ២០២៤ មុនពេលការដួលរលំរបស់របបលោក អាសាដ មកត្រឹម ៣.៥០០នាក់ ក្នុងខែកញ្ញា ឆ្នាំ ២០២៥។ ទោះយ៉ាងណាក៏ដោយ ជនជាតិស៊ីរីមានបញ្ហាច្រើនបំផុត ដែលកំពុងរង់ចាំការសម្រេចចិត្តនៅដំណាក់កាលដំបូង៕