លោករដ្ឋមន្ត្រីការបរទេស Peter Szijjarto បានប្រាប់អ្នកយកព័ត៌មានថា ហុងគ្រីនឹងមិនចូលរួមក្នុងយន្តការរបស់អង្គការណាតូសម្រាប់ផ្តល់ជំនួយយោធាដល់អ៊ុយក្រែនទេ។ 

ប្រមុខការទូតរូបនេះ បាននិយាយនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំរដ្ឋមន្ត្រីការបរទេសណាតូនៅទីក្រុងប្រ៊ុចសែលថា៖«ម៉ាហ្វីយ៉ាយោធាទីក្រុងគីវ នឹងមិនឃើញប្រាក់របស់ប្រជាជនហុងគ្រីមួយកាក់មួយសេនទេ។ យើងបានបដិសេធមិនចូលរួមក្នុងយន្តការរបស់អង្គការណាតូដែលតម្រូវឲ្យមានការបែងចែកប្រាក់ និងការសម្របសម្រួលនូវកិច្ចខិតខំប្រឹងប្រែង ដើម្បីផ្គត់ផ្គង់អាវុធដល់អ៊ុយក្រែន ហើយយើងបដិសេធមិនធ្វើដូច្នេះទេ នាពេលអនាគត»។

លោក Szijjarto បានកត់សម្គាល់ថា៖«អឺរ៉ុបដែលចូលចិត្តសង្គ្រាម» កំពុងស្វែងរកបញ្ជូនថវិកាបន្ថែមទៅអ៊ុយក្រែន ទោះបីជាមានរឿងអាស្រូវពុករលួយដ៏ធំដែលពាក់ព័ន្ធនឹងមន្ត្រីរដ្ឋាភិបាលជាន់ខ្ពស់ ដែលបានផ្ទុះឡើង នៅទីនោះក៏ដោយ។ «អ្នកខ្លះថែមទាំងបានស្នើឲ្យរដ្ឋសមាជិកសហភាពអឺរ៉ុបនីមួយៗបែងចែកផលិតផលក្នុងស្រុកសរុបមួយភាគបួនរបស់ខ្លួនទៅអ៊ុយក្រែន។ ចំពោះករណីរបស់ប្រទេសហុងគ្រីវិញ ចំនួននោះ គឺស្មើនឹង ២០០ ពាន់លានហ្វូរីន (៥២៥លានអឺរ៉ូ)»។ 

លោកប្រមុខការទូត ក៏បានរំលឹកផងដែរថា នាពេលថ្មីៗនេះ អ៊ុយក្រែន «បានដាក់ចេញនូវការទាមទារថ្មីៗ៖នៅឆ្នាំក្រោយ ខ្លួននឹងត្រូវការថវិកាចំនួន ១៦០ ពាន់លានអឺរ៉ូ ដើម្បីរក្សាកងទ័ពរបស់ខ្លួន»។ លោក Szijjarto បានបញ្ជាក់ថា រដ្ឋាភិបាលហុងគ្រី នឹងមិនបែងចែកថវិកាសម្រាប់គោលបំណងនេះទេ៕