ប្រធានាធិបតីកូរ៉េខាងត្បូង លោក Lee Jae Myung បាននិយាយកាលពីថ្ងៃពុធ (៣ ធ្នូ) ថា លោកពិតជាចាប់អារម្មណ៍ និងរីករាយណាស់ក្នុងការបានសន្ទនាជាមួយលោកប្រធានាធិបតី Donald Trump អំឡុងកិច្ចប្រជុំថ្មីៗនេះ ហើយនៅតែមានសង្ឃឹមថា មេដឹកនាំអាមេរិករូបនេះអាចបញ្ចុះបញ្ចូលកូរ៉េខាងជើង ឱ្យបន្តការសន្ទនាឡើងវិញ។

ចាប់តាំងពីលោក Lee ចូលកាន់តំណែងក្នុងខែមិថុនាមក លោកបានធ្វើកិច្ចប្រជុំកំពូលចំនួន ២លើក ជាមួយលោក Trump និងបានសម្រេចកិច្ចព្រមព្រៀងពាណិជ្ជកម្មមួយ ដែលរួមបញ្ចូលកញ្ចប់វិនិយោគចំនួន ៣៥០ពាន់លានដុល្លារអាមេរិក បន្ទាប់ពីការចរចាអស់ជាច្រើនខែ។

លោក Lee ប្រើយុទ្ធសាស្រ្តដ៏ទាក់ទាញក្នុងកិច្ចប្រឹងប្រែងគ្រប់គ្រងទំនាក់ទំនងដែលមានហានិភ័យខ្ពស់ជាមួយសម្ព័ន្ធមិត្តដ៏សំខាន់របស់ទីក្រុងសេអ៊ូលមួយនេះ ដោយបានលើកសរសើរលោក Trump សម្រាប់តួនាទី "អ្នកបង្កើតសន្តិភាព" លើបញ្ហាកូរ៉េខាងជើង និងបានជូនមកុដស្រោបមាសដ៏ខ្ពង់ខ្ពស់ ក្នុងទស្សនកិច្ចទៅកាន់កូរ៉េខាងត្បូង កាលពីពេលកន្លងទៅ។

ក្នុងសន្និសីទសារព័ត៌មានជាមួយប្រព័ន្ធផ្សព្វផ្សាយបរទេសកាលពីថ្ងៃពុធ ដើម្បីប្រារព្ធខួបទីមួយនៃវិបត្តិច្បាប់អាជ្ញាសឹក លោក Lee បានបន្តលើកសរសើរលោក Trump មិនដាច់ពីមាត់។ ទន្ទឹមនឹងនោះ ប្រធានាធិបតីកូរ៉េខាងត្បូងរូបនេះ បានសម្ដែងក្ដីសង្ឃឹមថា លោក Trump នឹងអាចទាក់ទាញមេដឹកនាំកូរ៉េខាងជើង លោក Kim Jong Un ឱ្យបន្តការសន្ទនាឡើងវិញ ដោយនិយាយថា ទីក្រុងព្យុងយ៉ាង ហាក់យកចិត្តទុកដាក់ខ្លាំងលើទីក្រុងវ៉ាស៊ីនតោន ដើម្បីទ្រទ្រង់របបរបស់ខ្លួន៕