អាជ្ញាធរទីក្រុងហុងកុង បានបញ្ជាឱ្យរុះរើសំណាញ់រន្ទានៅតាមសំណង់ជាង ២០០ទីតាំង ទូទាំងទីក្រុង ឱ្យបានត្រឹមថ្ងៃសៅរ៍ ទី៦ ខែធ្នូ ខាងមុខនេះ បន្ទាប់ពីអាជ្ញាធរបានរកឃើញវិញ្ញាបនបត្រសុវត្ថិភាពក្លែងក្លាយដែលត្រូវសង្ស័យ នៅកន្លែងសាងសង់ចំនួន ២ទីតាំង បន្ទាប់ពីអគ្គិភ័យនៅតំបន់លំនៅឋាន Tai Po ដែលបានឆក់យកជីវិតមនុស្សជិត ១៦០នាក់។

រយៈពេល ១សប្តាហ៍បន្ទាប់ពីគ្រោះមហន្តរាយដ៏អាក្រក់បំផុតរបស់ហុងកុង ក្នុងពេលជាច្រើនទសវត្សរ៍ នគរបាលកាលពីថ្ងៃពុធ បានចាប់ខ្លួនបុរស ៦នាក់ ពីក្រុមហ៊ុនដែលទទួលខុសត្រូវចំពោះប្រព័ន្ធកណ្ដឹងរោទិ៍អគ្គិភ័យ នៅតំបន់លំនៅដ្ឋានរបស់តុលាការ Wang Fuk ជាទីដែលអគ្គិភ័យបានឆាបឆេះអគារចំនួន ៧ខ្នង ដែលគ្របដណ្ដប់ដោយរន្ទាឫស្សី និងសំណាញ់សុវត្ថិភាព។

ជនទាំងនោះត្រូវចោទប្រកាន់ថា បានធ្វើសេចក្តីប្រកាសមិនពិតទៅនាយកដ្ឋានសេវាអគ្គិភ័យ ដែលនិយាយថា ប្រព័ន្ធកណ្ដឹងអាសន្ននៅអចលនទ្រព្យទាំងនោះ នឹងមិនគាំង ឬអសកម្មនោះទេ ក្នុងអំឡុងការងារជួសជុល។

មន្រ្តីនៅស្ថាប័នអភិវឌ្ឍរបស់ក្រុងហុងកុង បាននិយាយថា "វិធីសាស្រ្តដ៏តឹងរឹង" គឺចាំបាច់ ហើយបានបញ្ជាឱ្យអគារឯកជនប្រហែល ២០០ទីតាំង និងប្លុកលំនៅដ្ឋានសាធារណៈ ឬអគាររដ្ឋាភិបាលរាប់សិបកន្លែង ត្រូវតែរុះរើសំណាញ់រន្ទាទាំងនោះ នៅត្រឹមថ្ងៃសៅរ៍ចុងសប្ដាហ៍នេះ៕