លោក Vasily Nebenzya តំណាងអចិន្ត្រៃយ៍របស់រុស្ស៊ីប្រចាំអង្គការសហប្រជាជាតិ បានមកដល់ប្រទេសលីបង់ ក្នុងនាមជាផ្នែកមួយនៃគណៈប្រតិភូនៃរដ្ឋជាសមាជិកក្រុមប្រឹក្សាសន្តិសុខអង្គការសហប្រជាជាតិ។

សេវាសារព័ត៌មាននៃបេសកកម្មរបស់រុស្ស៊ីប្រចាំអង្គការសហប្រជាជាតិ បាននិយាយនៅលើបណ្តាញ Telegram របស់ខ្លួនថា៖«នៅថ្ងៃទី ០៣ ខែធ្នូ តំណាងអចិន្ត្រៃយ៍លោក V. A. Nebenzya បានមកដល់ប្រទេសលីបង់ ក្នុងនាមជាផ្នែកមួយនៃគណៈប្រតិភូនៃរដ្ឋជាសមាជិកក្រុមប្រឹក្សាសន្តិសុខអង្គការសហប្រជាជាតិ»។ សេចក្តីថ្លែងការណ៍នេះ បានឲ្យដឹងថា៖«អ្នកការទូតរូបនេះ មានគម្រោងជួបជាមួយថ្នាក់ដឹកនាំនៃសាធារណរដ្ឋលីបង់ នៅទីក្រុងបេរូត ក៏ដូចជាទៅទស្សនាតំបន់ទទួលខុសត្រូវរបស់ UNIFIL (កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់) ដែលដើរតួនាទីយ៉ាងសំខាន់ក្នុងការរក្សាភាពស្ងប់ស្ងាត់នៅភាគខាងជើងនៃខ្សែបន្ទាត់ពណ៌ខៀវ»។

បេសកជនរូបនេះ ក៏បានបញ្ជាក់ថា ក្នុងនាមជាផ្នែកមួយនៃដំណើរទស្សនកិច្ចរបស់គណៈប្រតិភូទៅកាន់មជ្ឈិមបូព៌ា តំណាងក្រុមប្រឹក្សាសន្តិសុខUN នឹងទៅទស្សនាប្រទេសស៊ីរីជាលើកដំបូងក្នុងប្រវត្តិសាស្ត្ររបស់ក្រុមប្រឹក្សានេះ។

កាលពីចុងខែសីហា ក្រុមប្រឹក្សាសន្តិសុខអង្គការសហប្រជាជាតិ បានបន្តអាណត្តិរបស់ UNIFIL រហូតដល់ថ្ងៃទី ៣១ ខែធ្នូ ឆ្នាំ ២០២៦ ហើយបានបញ្ជាឲ្យចាប់ផ្តើមកាត់បន្ថយ និងដកចេញនូវបុគ្គលិករបស់ខ្លួន ដោយមានសណ្តាប់ធ្នាប់ និងសុវត្ថិភាព ចាប់ពីថ្ងៃទី ៣១ ខែធ្នូ ឆ្នាំ ២០២៦ ក្នុងរយៈពេលមួយឆ្នាំ៕