ប្រទេសចិន កាលពីថ្ងៃពុធ (ទី៣ ខែធ្នូ) បានបង្ហាញការប្រឆាំងទៅនឹង «កងកម្លាំងខាងក្រៅ» ដែលជ្រៀតជ្រែកក្នុងកិច្ចការរបស់វ៉េណេស៊ុយអេឡា ខណៈដែលប្រតិបត្តិការយោធាអាមេរិក នៅទូទាំងតំបន់អាមេរិកឡាទីន រីកកាន់តែធំ។

នៅឯសន្និសីទសារព័ត៌មានប្រចាំថ្ងៃ ក្នុងទីក្រុងប៉េកាំង អ្នកនាំពាក្យក្រសួងការបរទេសចិន លោក Lin Jian បានលើកឡើងថា៖ «ប្រទេសចិនប្រឆាំងរាល់វិធានការដែលបំពានលើគោលបំណង និងគោលការណ៍នៃធម្មនុញ្ញអង្គការសហប្រជាជាតិ ឬរំលោភលើអធិបតេយ្យភាព និងសន្តិសុខរបស់ប្រទេសផ្សេងទៀត»។

ជាមួយគ្នានេះ លោកបានបន្ថែមទៀតថា ទីក្រុងប៉េកាំង «ប្រឆាំងនឹងកងកម្លាំងខាងក្រៅដែលជ្រៀតជ្រែកកិច្ចការផ្ទៃក្នុងរបស់វ៉េណេស៊ុយអេឡា» ក្រោមលេសណាមួយ ដោយលោកបានជំរុញឲ្យភាគីទាំងអស់រួមគ្នាធ្វើឲ្យអាមេរិកឡាទីន និងការ៉ាអ៊ីប ជា «តំបន់សន្តិភាព» និងទប់ស្កាត់កុំឲ្យស្ថានការណ៍នេះកាន់តែតានតឹងខ្លាំងឡើងៗ។

ការកត់សម្គាល់នេះកើតឡើងបន្ទាប់ពីមានការពង្រីកប្រតិបត្តិការយោធាអាមេរិក រយៈពេលប៉ុន្មានខែ នៅទូទាំងតំបន់អាមេរិកឡាទីន ដោយមានការដាក់ពង្រាយកងម៉ារីន នាវាចម្បាំង យន្តហោះចម្បាំង និងយន្តហោះទម្លាក់គ្រាប់បែក នាវាមុជទឹក និងយានដ្រូន ស្របពេលមានការរំពឹងទុកថា ទីក្រុងវ៉ាស៊ីនតោន អាចបើកការវាយប្រហារលើវ៉េណេស៊ុយអេឡា។

គួរបញ្ជាក់ថា រហូតមកដល់ពេលនេះ យោធាអាមេរិកបានធ្វើការវាយប្រហារចំនួន ២១លើក លើទូកដែលសង្ស័យថា រត់ពន្ធគ្រឿងញៀន ដោយបានបណ្តាលឲ្យមនុស្សយ៉ាងហោចណាស់ ៨៣នាក់ស្លាប់ ដែលរដ្ឋបាលរបស់លោកប្រធានាធិបតី Donald Trump បានពិពណ៌នាថា ជា «ភេរវករគ្រឿងញៀន»៕