សមាជិកព្រឹទ្ធសភាអាមេរិកមួយក្រុមពីគណបក្សប្រជាធិបតេយ្យ និងសាធារណរដ្ឋ បានដាក់សេចក្តីសម្រេចមួយ កាលពីថ្ងៃពុធ (ទី៣ ខែធ្នូ) ដែលនឹងរារាំងវិធានការយោធារបស់សហរដ្ឋអាមេរិក ប្រឆាំងនឹងប្រទេសវ៉េណេស៊ុយយអេឡា ប្រសិនបើមិនមានការយល់ព្រមពីសភា បន្ទាប់ពីលោកប្រធានាធិបតី Donald Trump បាននិយាយថា ប្រតិបត្តិការលើដីគោក នឹងចាប់ផ្តើមក្នុងពេលឆាប់ៗនេះ។

ទាហានអាមេរិកបានធ្វើការវាយប្រហារយ៉ាងហោចណាស់ ២១លើក លើទូកសង្ស័យដឹកគ្រឿងញៀន នៅសមុទ្រការ៉ាអ៊ីប និងមហាសមុទ្រប៉ាស៊ីហ្វិក ចាប់តាំងពីដើមខែកញ្ញាមក ដោយបានសម្លាប់មនុស្ស ៨៣នាក់យ៉ាងតិច ខណៈដែលលោក Trump បង្កើនកម្លាំងយោធាកាន់តែខ្លាំងឡើងៗ ប្រឆាំងនឹងរដ្ឋាភិបាលរបស់ប្រធានាធិបតីវ៉េណេស៊ុយអេឡា លោក Nicolas Maduro។

ហើយកាលពី ២ថ្ងៃកន្លងមកនេះ លោក Trump បានប្រាប់អ្នកសារព័ត៌មាននៅសេតវិមានម្តងហើយម្តងទៀតថា ការវាយប្រហារលើដីគោក នឹងចាប់ផ្តើម «ឆាប់ៗនេះ»។

ជាការឆ្លើយតបទៅនឹងសម្ដីរបស់លោក សមាជិកព្រឹទ្ធសភាគណបក្សប្រជាធិបតេយ្យ លោក Tim Kaine នៅរដ្ឋ Virginia លោក Chuck Schumer នៅរដ្ឋ New York និងលោក Adam Schiff នៅរដ្ឋ California និងសមាជិកព្រឹទ្ធសភាគណបក្សសាធារណរដ្ឋ លោក Rand Paul នៃរដ្ឋ Kentucky បាននិយាយថា ពួកលោក បានដាក់សេចក្ដីសម្រេច ជុំវិញសិទ្ធិអំណាចធ្វើសង្រ្គាម។

សមាជិកសភាដែលបានព្យាយាមម្តងហើយម្តងទៀត ក្នុងការរារាំងការលុកលុយរបស់លោក Trump លើវ៉េណេស៊ុយអេឡា បានប្រាប់កាលពីថ្ងៃទី២ ខែធ្នូថា ពួកគេនឹងដាក់ជូននូវសេចក្ដីសម្រេចថ្មី ដើម្បីជំរុញឲ្យមានការបោះឆ្នោតសភា ស្ដីពីបញ្ហានេះ ប្រសិនបើរដ្ឋបាលបើកការវាយប្រហារ។ ប៉ុន្តែនៅថ្ងៃទី៣ ខែធ្នូ ពួកគេបានបញ្ជាក់ថា ការលើកឡើងរបស់លោក Trump បានជំរុញឲ្យពួកគេចាប់ផ្ដើមដំណើរការនេះតែម្ដង៕