ប្រទេសចិន និងរុស្ស៊ី បានឈានដល់ «ការឯកភាពគ្នាយ៉ាងទូលំទូលាយ» លើបញ្ហាជាច្រើន អំឡុងដំណើរទស្សនកិច្ចរបស់រដ្ឋមន្ត្រីការបរទេសចិន នៅទីក្រុងមូស្គូ ក្នុងសប្តាហ៍នេះ ស្របពេលមានសន្ទុះនៃកិច្ចប្រឹងប្រែងការទូត ដើម្បីបញ្ចប់សង្រ្គាម នៅអ៊ុយក្រែន និងខណៈដែលទីក្រុងប៉េកាំងស្វែងរកការគាំទ្រ ជុំវិញជម្លោះជាមួយទីក្រុងតូក្យូ។

យោងតាមសេចក្ដីថ្លែងការណ៍របស់ក្រសួងដែលត្រូវបានចេញផ្សាយកាលពីថ្ងៃពុធ (ទី៣ ខែធ្នូ) បានឲ្យដឹងថា លោក Wang Yi បានប្រាប់សមភាគីរុស្ស៊ី លោក Sergei Lavrov កាលពីថ្ងៃអង្គារនេះថា ទីក្រុងប៉េកាំង និងទីក្រុងមូស្គូ ត្រូវតែ «បន្តសម្របសម្រួល និងសហប្រតិបត្តិការ» ដើម្បីដោះស្រាយយ៉ាងម៉ឺងម៉ាត់នូវសកម្មភាពបង្កហេតុរបស់កងកម្លាំងស្តាំនិយមជ្រុលរបស់ជប៉ុន ដែលនឹងធ្វើឲ្យខូចសន្តិភាព និងស្ថិរភាព ក្នុងតំបន់ ហើយប៉ុនប៉ងសាងកម្លាំងយោធាឡើងវិញ»។

ការកត់សម្គាល់នេះកើតឡើងស្របពេលមានវិបត្តិការទូតដ៏អាក្រក់បំផុតជាលើកដំបូង ក្នុងរយៈពេលប៉ុន្មានឆ្នាំមកនេះ រវាងទីក្រុងប៉េកាំង និងទីក្រុងតូក្យូ បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បាននិយាយកាលពីខែមុនថា ប្រសិនបើចិនវាយប្រហារលើកោះតៃវ៉ាន់ដែលគ្រប់គ្រងដោយលទ្ធិប្រជាធិបតេយ្យ អាចបង្កឲ្យមានការឆ្លើយតបពីទីក្រុងតូក្យូ។

ជាមួយគ្នានេះ សេចក្តីថ្លែងការណ៍របស់ក្រសួងការបរទេសចិននេះ បានបន្ថែមថា នៅក្នុងកិច្ចប្រជុំដាច់ដោយឡែកមួយទៀត លោក Wang និងលេខាធិការក្រុមប្រឹក្សាសន្តិសុខរុស្ស៊ី លោក Sergei Shoigu «បានយល់ស្របជាយុទ្ធសាស្ត្រ លើបញ្ហាពាក់ព័ន្ធនឹងជប៉ុន ហើយឈានដល់កម្រិតខ្ពស់នៃការឯកភាពគ្នានោះ»។

គួរបញ្ជាក់ថា ដំណើរទស្សនកិច្ចរបស់លោក Wang នេះ បានធ្វើឡើងស្របនឹងដំណើរទៅកាន់ទីក្រុងមូស្គូរបស់បេសកជនពិសេសរបស់ប្រធានាធិបតីអាមេរិក លោក Donald Trump គឺលោក Steve Witkoff និងកូនប្រសារបស់មេដឹកនាំអាមេរិក គឺលោក Jared Kushner៕