កិច្ចប្រជុំកំពូលលើកទី៤៦នៃក្រុមប្រឹក្សាជាន់ខ្ពស់របស់ក្រុមប្រឹក្សាសហប្រតិបត្តិការឈូងសមុទ្រ (GCC) បានបញ្ចប់កាលពីថ្ងៃពុធជាមួយនឹងសេចក្តីថ្លែងការណ៍ Sakhir ដែលសង្កត់ធ្ងន់លើឯកភាពក្នុងតំបន់។

សេចក្តីថ្លែងការណ៍នេះ បានបញ្ជាក់ថា ក្រុមមេដឹកនាំឈូងសមុទ្រប្តេជ្ញាបន្តជំរុញការសម្របសម្រួល និងការធ្វើសមាហរណកម្មក្នុងចំណោមរដ្ឋជាសមាជិក GCC ទៅលើវិស័យនយោបាយ សន្តិសុខ សេដ្ឋកិច្ច និងសង្គម ដើម្បីសម្រេច«គោលដៅរួម»។

មេដឹកនាំបានសម្តែងការពេញចិត្តចំពោះសមិទ្ធផលរួមបញ្ចូលគ្នា ដែលបានធ្វើឡើងតាមបណ្តោយផ្លូវនៃសកម្មភាពរួមគ្នានៅឈូងសមុទ្រ ដែលឆ្លុះបញ្ចាំងនៅក្នុងក្របខ័ណ្ឌការពារជាតិ និងសន្តិសុខដ៏រ៉ឹងមាំ ជំហរការទូតរួម និងគម្រោងអភិវឌ្ឍន៍ និងសេដ្ឋកិច្ចប្រកបដោយចីរភាព។

ពួកគេបានបញ្ជាក់ថា សន្តិសុខ និងស្ថិរភាពរបស់រដ្ឋ GCC ទាំងអស់ គឺមិនអាចបំបែកបាន ហើយថា គ្រោះថ្នាក់ណាមួយចំពោះអធិបតេយ្យភាពរបស់រដ្ឋជាសមាជិក គឺជាគ្រោះថ្នាក់ដោយផ្ទាល់ដល់សន្តិសុខរួមរបស់ពួកគេ។

មេដឹកនាំទាំងនោះ ក៏បានបញ្ជាក់ពីការគាំទ្ររបស់ពួកគេចំពោះកិច្ចខិតខំប្រឹងប្រែងក្នុងតំបន់ និងអន្តរជាតិ ដែលមានគោលបំណងធានាការប្រកាន់ខ្ជាប់យ៉ាងពេញលេញចំពោះកិច្ចព្រមព្រៀងឈប់បាញ់នៅហ្កាហ្សា ដោយសម្រួលដល់ការផ្តល់ជំនួយមនុស្សធម៌ ការកសាងឡើងវិញ និងការជំរុញកិច្ចខិតខំប្រឹងប្រែង ដើម្បីបង្កើតរដ្ឋប៉ាឡេស្ទីនឯករាជ្យ និងមានអធិបតេយ្យភាព ផ្អែកលើព្រំដែនខែមិថុនា ឆ្នាំ១៩៦៧ ដោយទីក្រុងហ្ស៊េរុយ រូសាឡឹមខាងកើត ជារដ្ឋធានីរបស់ខ្លួន៕