ការិយាល័យរបស់ប្រធានាធិបតីកូរ៉េខាងត្បូង នៅថ្ងៃព្រហស្បតិ៍ (ទី៤ ខែធ្នូ) នេះ បានបញ្ជាក់ថា ពលរដ្ឋរបស់ខ្លួនចំនួន ៦នាក់ ត្រូវបានឃុំឃាំងនៅកូរ៉េខាងជើង អស់រយៈពេលជាច្រើនឆ្នាំមកហើយ ដោយការអះអាងនេះ កើតមានបន្ទាប់ពីលោកប្រធានាធិបតី Lee Jae Myung ហាក់ដូចជាមិនបានដឹងពីស្ថានភាពរបស់ពួកគេសោះ ក្នុងអំឡុងពេលផ្ដល់បទសម្ភាសន៍ជាមួយប្រព័ន្ធផ្សព្វផ្សាយបរទេស។

នៅពេលត្រូវបានសួរកាលពីថ្ងៃពុធ អំពីប្រជាជនកូរ៉េខាងត្បូងដែលត្រូវបានឃុំខ្លួននៅកូរ៉េខាងជើង លោក Lee បានឆ្លើយតបថា៖ «វាគឺជាលើកទី១ របស់ខ្ញុំ ដែលបានឮអំពីរឿងនេះ»។

ក្រោយមក ការិយាល័យរបស់លោក Lee បានផ្ដល់ព័ត៌មានបន្ថែមជាមួយនឹងសេចក្តីថ្លែងការណ៍ ដែលឲ្យដឹងថា ពលរដ្ឋ ៦នាក់ ដែលរួមមានអ្នកផ្សព្វផ្សាយសាសនាគ្រិស្ត និងអ្នករត់ចេញពីកូរ៉េខាងជើងផងដែរ ត្រូវបានឃុំខ្លួន ចាប់តាំងពីមានការចាប់ខ្លួនពួកគេ «នៅចន្លោះឆ្នាំ២០១៣ និងឆ្នាំ២០១៦ ក្រោមការចោទប្រកាន់ពីបទចារកម្ម និងក្នុងចំណោមករណីផ្សេងទៀត»។

សេចក្ដីថ្លែងការណ៍បានបន្ថែមថា ៤នាក់ ក្នុងចំណោមពួកគេ ត្រូវបានប្រកាសដោយទីក្រុងព្យុងយ៉ាងដែលបានចោទប្រកាន់ពួកគេពីបទចារកម្ម ជាបទចោទដែលត្រូវទទួលទណ្ឌកម្មធ្ងន់ធ្ងរ ក្នុងនោះរួមទាំងការប្រហារជីវិតផងដែរ នៅក្នុងប្រទេសផ្តាច់ការមួយនេះ។ សេចក្ដីថ្លៃងការណ៍បានសង្កត់ធ្ងន់ថា៖ «រដ្ឋាភិបាលនឹងធ្វើការ ដើម្បីដោះស្រាយបញ្ហានេះ តាមរយៈកិច្ចប្រឹងប្រែងនានា ដើម្បីចាប់ផ្តើមការសន្ទនាអន្តរកូរ៉េឡើងវិញយ៉ាងឆាប់រហ័ស»។

នៅឯសន្និសីទសារព័ត៌មាន កាលពីថ្ងៃពុធ លោក Lee បានងាកទៅរកទីប្រឹក្សាសន្តិសុខជាតិរបស់លោក គឺលោក Wi Sung-lac ដើម្បីឲ្យជួយឆ្លើយសំណួរ។ លោក Wi បាននិយាយថា មានករណីពលរដ្ឋកូរ៉េខាងត្បូង មិនអាចវិលត្រឡប់មកវិញបាន បន្ទាប់ពីបានចូលទៅកូរ៉េខាងជើង និង «ករណីមិនបានដឹងលម្អិតផ្សេងទៀត» ប៉ុន្តែមិនអាចបញ្ជាក់ពីពេលវេលានៃការចាប់ខ្លួនពួកគេបានឡើយ។

ក្រសួងបង្រួបបង្រួមរបស់ទីក្រុងសេអ៊ូលទទួលបន្ទុកកិច្ចការទំនាក់ទំនងអន្តរកូរ៉េ បានឲ្យដឹងនៅថ្ងៃព្រហស្បតិ៍នេះថា ខ្លួនបានលើកចុងក្រោយពីបញ្ហានេះជាមួយទីក្រុងព្យុងយ៉ាង កាលពីឆ្នាំ២០១៨៕