អ្នកដំណើររបស់ក្រុមហ៊ុនអាកាសចរណ៍ IndiGo បានជាប់ខ្លួនដោយសារការលុបចោលជើងហោះហើរនៅថ្ងៃព្រហស្បតិ៍នេះ គឺជាថ្ងៃទី ៣នៃភាពវឹកវរ បន្ទាប់ពីក្រុមហ៊ុនអាកាសចរណ៍ធំបំផុតរបស់ប្រទេសឥណ្ឌាមួយនេះ ពុំបានធ្វើការផ្លាស់ប្តូរឲ្យបានគ្រប់គ្រាន់ចំពោះការរៀបផែនការបញ្ជីឈ្មោះរបស់ខ្លួន ដើម្បីសម្របតាមបទប្បញ្ញត្តិថ្មីរបស់រដ្ឋាភិបាល ។

ជើងហោះហើរយ៉ាងហោច ១៧៥វ៉ុលរបស់ក្រុមហ៊ុន IndiGo ត្រូវបានលុបចោលនៅព្រឹកថ្ងៃព្រហស្បតិ៍នេះ ធ្វើឲ្យអ្នកដំណើរខឹងសម្បារ និងខកចិត្តយ៉ាងខ្លាំង នៅតាមអាកាសយានដ្ឋានធំៗក្នុងទីក្រុង New Delhi, Mumbai, Hyderabad, Pune និងទីក្រុង Bengaluru ។

កាលពីថ្ងៃពុធ ជើងហោះហើរយ៉ាងយោច ១៥០វ៉ុល ត្រូវបានលុបចោលផងដែរ ។ ភាគហ៊ុនរបស់ក្រុមហ៊ុន IndiGo បានធ្លាក់ចុះ ៣,៤ភាគរយនៅថ្ងៃព្រហស្បតិ៍នេះ ហើយបច្ចុប្បន្នបានធ្លាក់ចុះ ៦ភាគរយ សម្រាប់សប្តាហ៍នេះ ។

សហព័ន្ធអ្នកបើកបរយន្តហោះឥណ្ឌា និយាយថា ក្រុមហ៊ុន IndiGo ពុំអាចធ្វើការកែតម្រូវបញ្ជីឈ្មោះទាន់ពេលវេលា និងរៀបចំកាលវិភាគរបស់ខ្លួន ដោយសារបទបញ្ញត្តិថ្មី ដែលមានគោលដៅធ្វើឲ្យល្អប្រសើរឡើងសុវត្ថិភាព ។ បទបញ្ញត្តិនេះដែលត្រូវបានប្រកាសឡើងកាលពីឆ្នាំមុន បានចូលជាធរមានកាលពីថ្ងៃទី ១ ខែវិច្ឆិកាកន្លងទៅ ៕