ប្រទេសឥណ្ឌានឹងចំណាយប្រហែល ២ពាន់លានដុល្លារ ដើម្បីជួលនាវាមុជទឹកដើរដោយថាមពលនុយក្លេអ៊ែរពីរុស្ស៊ី បន្ទាប់ពីបានឈនដល់កិច្ចព្រមព្រៀង នៅពេលលោកប្រធានាធិបតី Vladimir Putin ធ្វើទស្សនកិច្ច នៅទីក្រុងញូវដេលី ក្នុងសប្តាហ៍នេះ។

បុគ្គលដែលដឹងពីបញ្ហានេះ បានប្រាប់ឲ្យដឹងថា ដំណើរការជួលនាវានេះត្រូវបានបញ្ចប់សព្វគ្រប់ បន្ទាប់ពីមានការពិភាក្សាប្រហែលមួយទសវត្សរ៍។ ដោយសុំនិយាយក្នុងលក្ខខណ្ឌមិនបញ្ចេញឈ្មោះ ព្រោះការពិភាក្សានេះ គឺជាកិច្ចការសម្ងាត់ ប្រភពបានបញ្ជាក់ថា ការពិភាក្សា ស្ដីពីការជួលនាវាមុជទឹកវាយប្រហារពីរុស្ស៊ី បានជាប់គាំងអស់ជាច្រើនឆ្នាំ ដោយសារការចរចាតម្លៃ។

ឥឡូវនេះ ភាគីទាំង២ បានព្រមព្រៀងគ្នាលើកិច្ចព្រមព្រៀងនេះហើយ ដោយមន្ត្រីឥណ្ឌាបានទៅមើលកន្លែងសាងសង់នាវារុស្ស៊ី កាលពីខែវិច្ឆិកា។ ឥណ្ឌារំពឹងថា នឹងទទួលបាននាវានេះ ក្នុងរង្វង់រយៈពេល ២ឆ្នាំ តែភាពស្មុគស្មាញនៃគម្រោងនេះ មានន័យថា វាអាចនឹងយឺតពេល។

គួរបញ្ជាក់ថា លោក Putin គ្រោងនឹងទៅដល់ឥណ្ឌា នៅថ្ងៃទី៤ ខែធ្នូនេះ សម្រាប់ដំណើរទស្សនកិច្ចលើកដំបូងរបស់លោកទៅកាន់ប្រទេសនេះ ចាប់តាំងពីមានការឈ្លានទ្រង់ទ្រាយធំរបស់រុស្ស៊ីលើអ៊ុយក្រែន។ លោកនឹងជួបនាយករដ្ឋមន្ត្រីឥណ្ឌា លោក Narendra Modi ដើម្បីបញ្ជាក់ពីទំនាក់ទំនងផ្នែកការពារជាតិ និងថាមពល រវាងប្រទេសទាំង២៕