នាថ្ងៃព្រហស្បតិ៍ (ទី៤ ខែធ្នូ) នេះ នៅឯអង្គការ ដើម្បីសន្តិសុខ និងសហប្រតិបត្តិការ នៅអឺរ៉ុប (OSCE) ជាស្ថាប័នសន្តិសុខ និងសិទ្ធិដែលប្រឹងប្រែងមានតួនាទីរបស់ខ្លួននៅក្នុងប្រទេសអ៊ុយក្រែនក្រោយសង្គ្រាម រដ្ឋមន្ត្រីការបរទេសអ៊ុយក្រែន បានបញ្ជាក់ថា ទីក្រុងគីវចង់បាន «សន្តិភាពពិតប្រាកដ មិនមែនជាការធ្វើសម្បទាន» ជាមួយរុស្ស៊ីនោះឡើយ។

ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធថា ផ្លូវឆ្ពោះទៅកាន់កិច្ចចរចាសន្តិភាព នាពេលនេះ គឺមិនច្បាស់លាស់នោះឡើយ បន្ទាប់ពីមាននូវអ្វីដែលលោកចាត់ទុកថា ជាកិច្ចចរចា «សមហេតុផល» រវាងប្រធានាធិបតីរុស្ស៊ី លោក Vladimir Putin និងបេសកជនអាមេរិក។

នៅក្នុងសុន្ទរកថាទៅកាន់ក្រុមប្រឹក្សារដ្ឋមន្ត្រីប្រចាំឆ្នាំរបស់ OSCE រដ្ឋមន្ត្រីការបរទេសអ៊ុយក្រែន លោក Andrii Sybiha បានលើកឡើងថា៖ «យើងនៅតែចងចាំឈ្មោះអ្នកដែលក្បត់មនុស្សជំនាន់ក្រោយ នៅទីក្រុង Munich (ប្រទេសអាល្លឺម៉ង់)។ រឿងនេះមិនគួរកើតឡើងម្តងទៀតទេ។ គោលការណ៍ត្រូវតែមិនអាចប៉ះពាល់បាន ហើយយើងត្រូវការសន្តិភាពពិតប្រាកដ មិនមែនការធ្វើសម្បទាននោះឡើយ»។

លោក Sybiha ទំនងជាកំពុងសំដៅទៅលើកិច្ចព្រមព្រៀងឆ្នាំ១៩៣៨ ជាមួយពួកណាហ្ស៊ីអាល្លឺម៉ង់ ដែលចក្រភពអង់គ្លេស បារាំង និងអ៊ីតាលី បានយល់ព្រមចំពោះការបញ្ចូល Sudetenland ជាដែនដីឧបសម្ព័ន្ធរបស់លោកហ៊ីត្លែរ ដែលជាដែនដីរបស់ប្រទេសឆេកូស្លូវ៉ាគី នាពេលនោះ។ កិច្ចព្រមព្រៀងនេះ ត្រូវបានគេប្រើយ៉ាងទូលំទូលាយថា ជានិមិត្តរូបនៃភាពបរាជ័យ ក្នុងការទប់ទល់នឹងអំណាចគំរាមកំហែង។ រុស្ស៊ីត្រូវគ្រោងឡើងនិយាយនៅក្នុងអង្គការនេះ នាពេលបន្ទាប់៕