ព្រះវិហារ Great Omari គឺជាសម្បតិ្តបេតិកភណ្ឌវប្បធម៌របស់តំបន់ហ្កាហ្សា ស្ថិតក្នុងទីក្រុងចាស់ មុនពេលការទម្លាក់គ្រាប់បែករបស់អ៊ីស្រាអែល ចាប់ផ្តើមកាលពីឆ្នាំ ២០២៣ ។

វាស្ថិតនៅក្នុងចំណោមតំបន់វប្បធម៌ដ៏សំខាន់បំផុតនៅដែនដីបិទច្រកមួយនេះ ដែលបច្ចុប្បន្នក្លាយជាអគារបាក់បែក ។ 

ពេលដែលមនុស្សជាង ៧ម៉ឺននាក់ ត្រូវបានសម្លាប់ អ្នករងរបួសរាប់មិនអស់ ហើយមនុស្សរាប់ម៉ឺននាក់ផ្សេងទៀត គ្មានផ្ទះសម្បែងរស់នៅ ការកសាងតំបន់ហ្កាហ្សាឡើងវិញ មិនមែនជាការងាយស្រួលនោះទេ ។

ស្ថាបត្យករ Hamuda al-Dahdar មកពីមន្ទីរអភិរក្សាវប្បធម៌ និងក្រុមការងាររបស់លោក កំពុងធ្វើការស្រោចស្រង់អ្វីដែលសេសសល់នៅព្រះវិហារប្រវត្តិសាស្រ្ត Pasha's Palace ។

ព្រះវិហារនេះមានអាយុកាលតំាងពីសតវត្សរ៍ទី ១៣មកម្ល៉េះ និងជាសារមន្ទីររក្សារតនសម្បត្តិដែលបច្ចុប្បន្នត្រូវបានរលាយសាបសូន្យអស់ទៅហើយ ។

លោក Hamuda និយាយថា មុនសង្រ្គាម ពួកយើងបានស្តា និងថែទាំទីតាំងប្រវត្តិសាស្រ្តសំខាន់មួយនេះ ដែលធ្លាប់ទទួលភ្ញៀវទេសចរក្នុងស្រុក និងបរទេសយ៉ាងច្រើន ។

លោកបន្តថា ប៉ុន្តែជាអកុសល ពេលដែលទីកន្លែងនេះ រលាយសាបសូន្យពេលសង្រ្គាមផ្ទុះឡើង បច្ចុប្បន្នពួកយើងបានត្រឹមតែស្តានូវអ្វីដែលនៅសេសសល់ប៉ុណ្ណោះ ដូចជាថ្មបុរាណ ជាការត្រៀមខ្លួនសម្រាប់ការងារស្តានាពេលអនាគត និងធ្វើឲ្យវារស់រានឡើងវិញម្តងទៀត ។

ដោយឡែក លោក Jehad Yasin គឺជាមន្រ្តីមកពីក្រសួងទេសចរណ៍ និងវត្ថុបុរាណប៉ាឡេស្ទីនមានមូលដ្ឋាននៅតំបន់កាន់កាប់វ៉េសប៊ែង និយាយថា ក្រុមមន្រ្តី និងអង្គការ UNESCO រៀបចំផែនការស្តាឡើងវិញ ៣ដំណាក់កាល ដែលមានតម្លៃ ១៣៣លានដុល្លារសម្រាប់តំបន់វប្បធម៌ប្រវត្តិសាស្រ្តនៅតំបន់ហ្កាហ្សា ៕