យោងតាមប្រភពចំនួន៤ និងរបាយការណ៍ចារកម្មសម្ងាត់ដែលត្រូវបានពិនិត្យដោយសារព័ត៌មានរ៉យទ័រ បានបង្ហាញថា ប្រទេសចិន កំពុងតែដាក់ពង្រាយនាវាកងទ័ពជើងទឹក និងនាវាឆ្មាំល្បាតឆ្នេរមួយចំនួនធំ នៅទូទាំងដែនទឹកអាស៊ីបូព៌ា ដែលនៅចំណុចមួយ ចិនពង្រាយនាវាច្រើនជាង ១០០គ្រឿង ក្នុងការបង្ហាញកម្លាំងដែនសមុទ្រដ៏ធំបំផុតរបស់ខ្លួនរហូតមកដល់បច្ចុប្បន្ននេះ។

ចិន កំពុងស្ថិតនៅចំកណ្តាលនូវអ្វីដែលតាមទម្លាប់ គឺជារដូវដ៏មមាញឹកសម្រាប់សមយុទ្ធយោធា ប៉ុន្តែកងទ័ពរំដោះប្រជាជនចិន មិនទាន់ធ្វើសេចក្ដីប្រកាសណាមួយពីសមយុទ្ធទ្រង់ទ្រាយធំផ្លូវការនោះទេ។

យ៉ាងណាក៏ដោយ កំណើនសាច់ដុំយោធាដ៏មហិមានេះ កើតមានឡើង ខណៈចិន និងជប៉ុន កំពុងស្ថិតក្នុងវិបត្តិការទូត ជុំវិញបញ្ហាកោះតៃវ៉ាន់។ លើសពីនេះ ទីក្រុងប៉េកាំង ក៏ខឹងសម្បារចំពោះការប្រកាសកាលពីខែមុនដោយមេដឹកនាំកោះតៃវ៉ាន់ លោក Lai Ching-te អំពីការចំណាយបន្ថែម ៤០ពាន់លានដុល្លារ លើវិស័យការពារជាតិរបស់កោះនេះ។

យោងតាមមន្ត្រីសន្តិសុខចំនួន៤រូបនៅក្នុងតំបន់ បានឱ្យដឹងថា នាវាចិន បានប្រមូលផ្តុំគ្នាទ្រង់ទ្រាយធំក្នុងដែនទឹក ដែលលាតសន្ធឹងពីភាគខាងត្បូងនៃសមុទ្រលឿង ឆ្លងទៅដល់សមុទ្រចិនខាងកើត និងចុះទៅសមុទ្រចិនខាងត្បូងដែលមានជម្លោះ ក៏ដូចជាចូលទៅក្នុងមហាសមុទ្រប៉ាស៊ីហ្វិកផងដែរ។

ឯកសារចារកម្មមួយចំនួនបង្ហាញថា គិតត្រឹមព្រឹកថ្ងៃព្រហស្បតិ៍សប្ដាហ៍នេះ នាវាចិនលើសពី ៩០គ្រឿង កំពុងប្រតិបត្តិការក្នុងតំបន់ទាំងនេះ ដែលធ្លាក់ចុះពីជាង ១០០គ្រឿង នៅចំណុចមួយកាលពីដើមសប្តាហ៍ដដែលនេះ៕