មេបញ្ជាការយោធាជាន់ខ្ពស់របស់អង្គការណាតូ បាននិយាយកាលពីថ្ងៃព្រហស្បតិ៍ (៤ ធ្នូ) ថា សម្ព័ន្ធយោធាត្រូវតែត្រៀមខ្លួនឱ្យបានរួចរាល់ ដើម្បីឆ្លើយតបនឹងកំណើនឥតឈប់ឈរនៃការគំរាមកំហែងកូនកាត់ ឬចម្រុះ ដើម្បីការពារទឹកដីនៃរដ្ឋជាសមាជិករបស់ខ្លួន។

គួរឱ្យដឹងថា ការគំរាមកំហែងកូនកាត់ឬចម្រុះនេះ សំដៅលើទាំងយុទ្ធសាស្ត្រយោធា និងមិនមែនយោធា ដែលរៀបចំឡើងដើម្បីបំផ្លាញសន្តិសុខរបស់សត្រូវ ហើយជាទូទៅ ក៏រួមមានការវាយប្រហារតាមអ៊ីនធឺណិត យុទ្ធនាការផ្សព្វផ្សាយព័ត៌មានមិនពិត ការបំផ្លិចបំផ្លាញហេដ្ឋារចនាសម្ព័ន្ធសំខាន់ៗ និងការប្រើប្រាស់យានដ្រូន ឬក្រុមប្រដាប់អាវុធមិនទៀងទាត់ផ្សេងទៀត។

ថ្លែងនៅទីស្នាក់ការកណ្តាលយោធាណាតូនៅបែលហ្ស៊ិក លោក Alexus Grynkewich ឧត្តមសេនីយកងទ័ពអាកាសអាមេរិក ដែលបម្រើការជាមេបញ្ជាការជាន់ខ្ពស់នៃសម្ព័ន្ធយោធាណាតូ បានលើកឡើងថា៖ "ការគំរាមកំហែងកូនកាត់គឺជាបញ្ហាដ៏ពិតប្រាកដ ហើយបញ្ហានេះរំពឹងថានឹងកើតឡើងកាន់តែច្រើន"។

ទាក់ទងនឹងឧប្បត្តិហេតុកូនកាត់ថ្មីៗនៅអឺរ៉ុប លោក Grynkewich បាននិយាយថា ហេតុការណ៍ខ្លះកើតដោយមិនបានប្រុងប្រយ័ត្ន និងខ្លះទៀតកើតដោយចេតនា ហើយសម្ព័ន្ធយោធាដឹងថា រុស្ស៊ីជាអ្នកនៅពីក្រោយឧប្បត្តិហេតុមួយចំនួន។ លោកបន្តថា៖ ណាតូត្រូវតែបុរេសកម្មក្នុងការត្រៀមខ្លួនជាស្រេចទប់ទល់រឿងបែបនេះ។

រុស្ស៊ីតែងតែបដិសេធការចោទប្រកាន់ដែលថាខ្លួននៅពីក្រោយឧប្បត្តិហេតុដ្រូន ឬការវាយប្រហារតាមអ៊ីនធឺណិត ដែលប៉ះពាល់ដល់ប្រទេសលោកខាងលិច។ ទីក្រុងមូស្គូក៏បានបដិសេធផងដែរថា ខ្លួនពុំមានផែនការវាយប្រហារលើអង្គការណាតូនោះទេ៕