មន្ទីរបញ្ចកោណបាននិយាយថា ខ្លួនបានគាំទ្រកតិកាសញ្ញាសន្តិសុខ AUKUS ត្រីភាគីជាមួយចក្រភពអង់គ្លេស និងអូស្ត្រាលី ដែលពាក់ព័ន្ធនឹងការទិញនាវាមុជទឹកនុយក្លេអ៊ែរ Virginia-class របស់ទីក្រុងកង់បេរ៉ា យ៉ាងហោចណាស់បីគ្រឿង ក្នុងរយៈពេល១៥ឆ្នាំ។

រដ្ឋបាលរបស់លោក Donald Trump បាននិយាយកាលពីដើមឆ្នាំនេះថា ខ្លួនកំពុងពិនិត្យឡើងវិញនូវកិច្ចព្រមព្រៀងឆ្នាំ២០២១ សម្រាប់នាវាមុជទឹកវាយប្រហារដើរដោយថាមពលនុយក្លេអ៊ែរដែលត្រូវបានចុះហត្ថលេខាក្រោមការដឹកនាំរបស់អតីតប្រធានាធិបតី លោក Joe Biden។

អ្នកនាំពាក្យមន្ទីរបញ្ចកោណលោក Sean Parnell បាននិយាយនៅក្នុងសេចក្តីថ្លែងការណ៍ថា ក្រសួងការពារជាតិបានបញ្ចប់ការពិនិត្យឡើងវិញរយៈពេល៥ខែរបស់ខ្លួន ដែលបានគាំទ្រដល់កិច្ចព្រមព្រៀង AUKUS ហើយបានកំណត់ថាវា «ស្របតាមរបៀបវារៈ America First របស់លោកប្រធានាធិបតី Trump»។

កិច្ចព្រមព្រៀង AUKUS មានគោលបំណងផ្តល់អាវុធដល់ប្រទេសអូស្ត្រាលីជាមួយនឹងក្រុមនាវាមុជទឹកទំនើបពីសហរដ្ឋអាមេរិក ហើយនឹងផ្តល់កិច្ចសហប្រតិបត្តិការក្នុងការអភិវឌ្ឍការត្រៀមបច្ចេកវិទ្យាសង្គ្រាម។ ការលក់នាវាមុជទឹក នឹងចាប់ផ្តើមនៅឆ្នាំ២០៣២ ដែលស្ថិតនៅចំកណ្តាលនៃយុទ្ធសាស្ត្ររបស់ប្រទេសអូស្ត្រាលីក្នុងការធ្វើឲ្យប្រសើរសមត្ថភាពវាយប្រហាររយៈចម្ងាយឆ្ងាយរបស់ខ្លួននៅតំបន់ប៉ាស៊ីហ្វិក ជាពិសេសប្រឆាំងនឹងប្រទេសចិន។