យោធាសហរដ្ឋអាមេរិកបានបើកការវាយប្រហារកាលពីថ្ងៃព្រហស្បតិ៍ទី៤ធ្នូសប្ដាហ៍នេះ លើទូកមួយដែលសង្ស័យថាដឹកជញ្ជូនគ្រឿងញៀននៅសមុទ្រប៉ាស៊ីហ្វិកខាងកើត ក្នុងតំបន់សមុទ្រការ៉ាអ៊ីប ដោយសម្លាប់មនុស្សបួននាក់នៅលើទូកនោះ នេះបើយោងតាមការបង្ហោះលើប្រព័ន្ធផ្សព្វផ្សាយសង្គមពីបញ្ជាការភាគខាងត្បូងសហរដ្ឋអាមេរិក។  

ការបង្ហោះនោះបាននិយាយថាបេសកកម្ម Southern Spear បានបើកការវាយប្រហារលើនាវាមួយនៅក្នុងដែនទឹកអន្តរជាតិដែលដំណើរការដោយអង្គការភេរវករដែលបានកំណត់។ ទីភ្នាក់ងារចារកម្មបានបញ្ជាក់ថានាវានេះកំពុងដឹកគ្រឿងញៀនខុសច្បាប់ និងកំពុងធ្វើដំណើរតាមផ្លូវ ដែលគេស្គាល់ថាផ្លូវជួញដូរគ្រឿងញៀន នៅសមុទ្រប៉ាស៊ីហ្វិកភាគខាងកើត ។ ភេរវករគ្រឿងញៀនជាបុរសបួននាក់នៅលើនាវានេះត្រូវបានសម្លាប់។  

ការវាយប្រហារកាលពីថ្ងៃព្រហស្បតិ៍សប្ដាហ៍នេះកើតឡើងខណៈមន្ទីរបញ្ចកោណកំពុងប្រឈមនឹងការរិះគន់ពីគណបក្សទាំងពីរលើការវាយប្រហារកាលពីខែកញ្ញាលើនាវាគ្រឿងញៀនដែលយោធាបានបាញ់ប្រហារជាបន្តបន្ទាប់ ដោយសម្លាប់ក្រុមសមាជិកនាវិកដែលនៅរស់រានមានជីវិត។ យ៉ាងហោចណាស់មនុស្ស ៨៧ នាក់ត្រូវបានសម្លាប់ក្នុងការវាយប្រហារលើទូកដែលសង្ស័យថាដឹកជញ្ជូនគ្រឿងញៀនចំនួន ២៣ គ្រឿង ជាផ្នែកមួយនៃយុទ្ធនាការមានឈ្មោះថា Operation Southern Spear ដែលរដ្ឋបាលលោក Trump និយាយថាមានគោលបំណងកាត់បន្ថយការជួញដូរគ្រឿងញៀន។

លោក Trump បានបង្ហាញថា អាមេរិក កំពុងត្រៀមការវាយលុកបន្ថែមទៀតប្រឆាំងនឹងការជួញដូរគ្រឿងញៀន ដោយនិយាយជាថ្មីទៀតថា ក្នុងពេលប៉ុន្មានថ្ងៃខាងមុខ យោធានឹងចាប់ផ្ដើមវាយប្រហារភ្លាមៗលើគោលដៅនានាក្នុងប្រទេសវ៉េណេស៊ុយអេឡា៕