ក្រុមមេដឹកនាំអឺរ៉ុបត្រូវបានគេរាយការណ៍ថាបានបង្ហាញការភ័យខ្លាចថារដ្ឋបាលលោក Trump កំពុងប្រើប្រាស់ការចរចាសន្តិភាពដើម្បីក្បត់អ៊ុយក្រែន ខណៈប្រទេសនេះកំពុងស្វែងរកការបញ្ចប់សង្គ្រាមជិតបួនឆ្នាំជាមួយរុស្ស៊ី។

យោងតាមសំណេរដែលលេចធ្លាយទទួលបានដោយសារព័ត៌មាន Spiegel របស់អាល្លឺម៉ង់ ក្នុងអំឡុងជំនួបពិភាក្សាតាមទូរស័ព្ទកាលពីថ្ងៃចន្ទដើមសប្ដាហ៍នេះ អគ្គលេខាធិការណាតូ លោក Mark Rutte អធិការបតីអាល្លឺម៉ង់ លោក Friedrich Merz និងប្រធានាធិបតីបារាំង លោក Emmanuel Macron បានលើកឡើងពីការព្រួយបារម្ភអំពីកិច្ចចរចាដែលដឹកនាំដោយបេសកជនអាមេរិក។ 

យោងតាមសំណេរជាភាសាអង់គ្លេសនៃការសន្ទនាតាមទូរស័ព្ទ លោក Macron បាននិយាយថា មានលទ្ធភាពដែលសហរដ្ឋអាមេរិកនឹងក្បត់អ៊ុយក្រែនលើបញ្ហាទឹកដីដោយគ្មានភាពច្បាស់លាស់លើការធានាសន្តិសុខ។មេដឹកនាំបារាំងរូបនេះ ក៏ត្រូវបានគេរាយការណ៍ផងដែរ ថាបាននិយាយថាប្រធានាធិបតីអ៊ុយក្រែន លោក Volodymyr Zelenskyy កំពុងស្ថិតក្នុងគ្រោះថ្នាក់យ៉ាងខ្លាំង។ 

ប្រធានាធិបតីហ្វាំងឡង់ លោក Alexander Stubb ដែលបានលើកសរសើរទំនាក់ទំនងរឹងមាំជាមួយលោកប្រធានាធិបតី Trump បានចែករំលែកអារម្មណ៍ស្រដៀងគ្នា ដោយជំរុញឱ្យលោក Zelenskyy កុំទុកចិត្តសេតវិមានខ្លាំងពេកលើឥទ្ធិពលការចរចាសន្តិភាព។

នាយករដ្ឋមន្រ្តីប៉ូឡូញលោក Donald Tusk នាយករដ្ឋមន្រ្តីអ៊ីតាលីលោកស្រី Giorgia Meloni, នាយករដ្ឋមន្រ្តីដាណឺម៉ាកលោក Mette Frederiksen នាយករដ្ឋមន្រ្តីន័រវេសលោក Jonas Gahr Støre ប្រធានគណៈកម្មការអឺរ៉ុបលោកស្រី Ursula von der Leyen និងប្រធានក្រុមប្រឹក្សាអឺរ៉ុបលោក António Costa ក៏ត្រូវបានគេរាយការណ៍ផងដែរថាបានចូលរួមក្នុងការពិភាក្សាតាមទូរស័ព្ទនោះ។

ភាគច្រើននៃក្រុមមេដឹកនាំបរទេសទាំងនោះ បានច្រានចោលមិនធ្វើអត្ថាធិប្បាយលើរបាយការណ៍អំពីការពិភាក្សារបស់ពួកគេ ៕